AB vat dit op die ken
2012-01-21 22:56
AB de Villiers het die Proteas se eerste nederlaag onder sy kapteinskap vierkantig op sy eie kennebak gevat.
De Villiers verkwalik homself vir baie van die dinge wat eergister hier skeefgeloop het, toe Sri Lanka die vierde eendagwedstryd tussen die spanne met vyf paaltjies gewen het.
Die Eilandmanne se 305/4 was ’n nuwe rekord op die Diamant-ovaal, waar die Proteas tot 299/7 beperk is.
Suid-Afrika hoop om sy klompie flaters met die vyfde en laaste kragmeting vandag op die Wanderers reg te stel.
De Villiers sê hulle moes in Kimberley minstens 330 gekry het en dis deels sý skuld dat dit nie gebeur het nie.
“Ek het my paaltjie ongelukkig op ’n slegte tyd verloor. Dit was nie die tyd om uit te gaan nie, want ons het in daardie stadium ’n vennootskap benodig. Ons het boonop net daarvoor en daarna weer ’n paaltjie verloor.
“Ek aanvaar die verantwoordelikheid daarvoor.”
Suid-Afrika was in ’n stadium op 171/1 in net die 24ste boulbeurt vir ’n yslike telling bestem.
Die paaltjies van JP Duminy (36), De Villiers (96) en Faf du Plessis (5) onderskeidelik in die 39ste, 41ste en 42ste boulbeurte was ’n hengse knou. Daar was toe nie veel momentum vir ’n eindpoging nie.
“Ons het die stertkantkolwers, met twee nuwelinge, daarmee kwaai onder druk geplaas.”
Die Proteas kon net 52 van die laaste tien boulbeurte af aanteken.
De Villiers sê voorts hy het dalk teen die einde van Sri Lanka se kolfbeurt takties gefouteer met van die boulers wat hy ingespan het: “Maar dís hoe ’n mens leer, ek sal volgende keer beter wees.”
Iemand wie se kolfwerk met rasse skrede verbeter het, is Graeme Smith, wat sy kritici met 68 van 69 balle stilgekolf het.
“Ek het gesê ’n groot beurt wag om die draai vir hom. Hopelik kan hy op dié nuutgevonde kolfpeil voortbou. Ek verwag dat hy in Johannesburg wéér lopies gaan aanteken,” sê De Villiers.
Hy verwag ook ’n beter veldwerkvertoning, nadat sy span soos in die vorige wedstryd weer ’n paar vangskote verbrou het en talle blapse in die veld gemaak het. Afgesien van Alviro Petersen se verstommende vangskoot sentimeters van die grenstou af om Kumar Sangakkara (32) te stuit, het die veldwerk veel te wens oorgelaat.
“Daar was talle uithardloopkanse en vangskote wat ons nie benut het nie. In gelykop-wedstryde soos dié moet jy dit doen as jy wil wen,” sê De Villiers.
Sri Lanka se kaptein, Tillakaratne Dilshan, sê ter versagting die Proteas kan tot ’n mate verskoon word omdat die buiteveld so oneweredig was.
Hy sê hul veldwerk was vir die eerste keer beter as Suid-Afrika s’n.
Dilshan het Sri Lanka vroeg op koers gekry en hy sal vandag ook wil voortbou op sy 87, wat hy van net soveel balle aangeteken het.
Thisara Perera het die wa met 69* van net 44 balle af met ’n handvol reuse-sesse deur die drif gekry. Hy is in sy eerste wedstryd van die reeks, vir sy kolfbeurt en die paaltjies van De Villiers en Duminy, verdienstelik as die speler van die wedstryd aangewys.