Cobras mik hoër
2010-07-17 23:43
Altus Momberg in Kaapstad
Die Cape Cobras se nuwe krieketafrigter, Richard Pybus, het die Kaap bo Indië gekies.
Pybus het die afgelope week amptelik ’n kontrak van drie jaar met die Kaapse streekspan gesluit nadat dit geruime tyd reeds bekend was dat hy die gunsteling is om die Cobras voortaan te brei.
Dit was die geleentheid om as ’n voltydse afrigter te werk, wat hom Kaap toe gelok het, sê Pybus.
Dié 46-jarige breier was die laaste jaar ’n konsultant by die Dolphins.
Sport24 het betroubaar verneem dat die sukkelende IPL-span die Kolkata Knight Riders ook Pybus in hul visier gehad het.
Ofskoon hy waarskynlik baie meer geld in die Indiese Premierliga (IPL) kon verdien het, is die IPL-sirkus ’n tien week lange gejaag waartydens daar bitter min tyd vir afrigting is.
Die IPL-spanne bestaan uit talle van die wêreld se beste spelers en die breier se werk is amper meer ’n kwessie van strategiese beplanning, pleks van spelers afrig in die ware sin van die woord.
By die Cobras gaan afrigting egter dié seisoen ’n groot rol speel. Die doelwitte wat vir die nuwe breier gestel is, is nie net om trofeë te wen nie, maar om ook die volgende geslag spelers vir die Proteas voor te berei.
Pybus het die afgelope week tydens sy bekendstelling gesê dat die geleentheid om ’n ware afrigter te wees, ’n groot rol in sy besluit gespeel het om die Kaapse uitdaging te aanvaar.
“Die ou grote (Justin Kemp, die Cobras se kaptein) en ek het lank gepraat oor sy ervaringe in Indië en ek het daarna die Cobras-pos gekies,” sê Pybus oor sy besluit om na die Kaap te kom.
Pybus, wat in Engeland gebore is, het ná sy aankoms in Suid-Afrika by krieketorganisasie by Selbourne-kollege in Oos-Londen betrokke geraak waarna hy Grens se junior strukture bestuur en dié provinsie se o.19-span vanaf 1994 tot 1997 gebrei het.
By Grens het hy ’n groot invloed op die vroeë loopbane van sterre soos Kemp, Mark Boucher en Makhaya Ntini gehad.
Hy is later tot Grens se senior afrigter bevorder voordat hy nog later met groot sukses die spanne van Pakistan en die Titans afgerig het.
Pybus se koms na die Kaap het groot verwagtinge in plaaslike kringe geskep.
Kemp se doelwit is om saam met Pybus die Cobras die toonaangewende span in die land te maak.
“Ons het verlede seisoen by tye goeie krieket gespeel en ons het talle puik spelers. Met Richard se professionalisme nou ook tot ons beskikking, kan ons beslis die volgende tree gee,” sê Kemp.
Pybus besef dat hy eers die Kaapse krieketkultuur sal moet aanleer voordat hy enige groot aanpassings aan die span se spel sal kan maak.
By die Titans het sy span ’n reputasie gehad vir hul aggressiewe spel.
“Ek sou wou glo dat die Titans hard, maar regverdig gespeel het. Ek sal egter eers die Kaapse kultuur moet aanleer voordat ek enige besluite oor die Cobras se spel gaan maak,” sê Pybus.
Die Cobras het verlede seisoen die halfeindronde van die MTN40- en Pro20-reeks gehaal voordat hulle die SuperSport-reeks op ’n drafstap gewen het.