Gary se groenes

Twee groentjies en een van Suid-Afrikaanse krieket se “verlore seuns” moet in Nieu-Seeland antwoorde op die tergende vrae in die Proteas-kamp verskaf.

Hoewel die nasionale keurders vandeesweek geweier het om versigtigheid oorboord te gooi (met die insluiting van die sukkelende Graeme Smith en Mark Boucher), het hulle tóg verras deur Marchant de Lange, Richard Levi en Justin Ontong te kies vir dié reeks van drie toets-, drie eendag- en drie Twintig20-wedstryde.

De Lange, wat laas maand in Durban sy toetsbuiging gemaak het teen Sri Lanka, is wéér in dié groep en behoort boonop sy eerste proesel van internasionale blitskrieket te kry.

Dié 21-jarige Tzaneen-blits het die Sri Lankane op Kingsmead disnis geboul, maar hy moes in die daaropvolgende toets in Kaapstad koeldrankies aandra toe Vernon Philander van ’n kniebesering herstel het.

De Lange se kans om op die Kiwi-kolwers losgelaat te word, sal dié keer grootliks afhang van die spelpeil van die Pro­teas se derde keuse sneller, Morné Morkel.

Dié Pretoriase hemelbesem beleef ’n wisselvallige seisoen en verkeer toenemend onder druk weens die meteoriese opgang van De Lange en veral Philander.

* Terselfdertyd sal Levi saamtoer as Hashim Amla se nuwe Twintig20-aanvangsmaat, nadat Smith die trekpas gekry het in dié weergawe.

Levi (24) het boulers behoorlik die skrik op die lyf gejaag in vanjaar se plaaslike Eendagbeker-reeks en beskik oor die vermoë om homself ook op die wêreldverhoog te vestig as ’n kanonkolf van formaat.
Dié bonkige Kapenaar is aan die einde van verlede jaar by die einste groep vir die reeks teen Australië ingesluit, maar hy het nooit speelkans gekry nie.

* Ontong is herroep tot die eendag- en Twintig20-spanne ná ’n afwesigheid van meer as twee jaar – volgens Andrew Hudson, die nasionale keurderbaas, weens sy voortreflike kolfpeil in die Eendagbeker- en SuperSportreekse, asook sy veelsydigheid.

“Ek was baie verbaas toe ek hoor ek is gekies, al het ’n klomp mense gesê ek is naby aan die toergroep,” het Ontong vandeesweek aan cricinfo.com erken.

“Ek hoop ek kan my tweede kans aangryp, want dié keer is ek veel meer ervare en ná die afgelope seisoen is my selfvertroue hoër as ooit.”

Dié 32-jarige Paarliet, met wie die keurders in die verlede gereeld klimtol gespeel het, sal in die eendagspan meeding om ’n middelorde-plek met huidige uitverkorenes soos Faf du Plessis en JP Duminy.

“Destyds het ek nooit werklik geweet waar ek staan of wat van my verwag word nie,” het Ontong gesê.

“Só is ek in my enigste twee toetse éérs as ’n kolwer en toe as ’n bouler gekies.

“As ’n speler nie weet hoe hy ingespan gaan word nie, kan hy nie sy beste gee nie – en hopelik is dinge dié keer anders.”

Hoewel Ontong homself opnuut in die korter weergawes van die spel sal moet bewys, het hy nog lank nie sy droom van ’n gereelde Proteas-toetsplek laat vaar nie.

En diegene wat meen hy is reeds oor die muur, maak ’n groot fout.

“Ek wil baie graag weer toetskrieket speel – en as ek goed genoeg kan vaar in dié reeks in Nieu-Seeland, kan ek dalk oorweeg word,” het hy gesê.

“In Suid-Afrika dink mense dalk jy is op 32 al klaar te oud, maar Australië het in die verlede gewys ’n speler is eers op sy beste wanneer hy in sy 30’s is.”