Graeme slaan terug

Die Proteas se sege in die beslissende toets op Nuweland het nie net aan dié span sy eerste tuisreekssege in meer as drie jaar en aan Graeme Smith ’n rekord-41ste oorwinning as toetskaptein besorg nie.

Dit was ook nét wat die Suid-Afrikaners nodig gehad het om die bitterbekke stil te maak, ná die vernederende loesing met 208 lopies voorverlede week op Kingsmead.

Smith is nou, saam met die voormalige Australiese kaptein Steve Waugh, op een na die kaptein met die meeste toets-oorwinnings nóg, nadat die Proteas Sri Lanka eergister met 10 paaltjies verslaan het om die reeks met 2-1 te beklink.

Die besoekers het sake voorverlede week op verrassende wyse met 1-1 gelykop gemaak, deur die tuisspan met 208 lopies in die tweede toets op Kingsmead te klop.

“Durban was nét die wekroep wat ons nodig gehad het, want dit het ons opnuut laat dink oor waarop ons dringend moet verbeter vir die moeilike pad wat voorlê,” het Smith gesê, met verwysing na sy span se toer na Nieu-Seeland aanstaande maand.

Smith-hulle kom ook later vanjaar in ’n weg-reeks teen Engeland te staan, voordat dié span probeer om sy epogmakende reekssege in Australië aan die begin van 2009 te herhaal.

“Om in dié plekke te gaan speel, is allesbehalwe maklik. Ons was baie lanklaas in Nieu-Seeland en dit gaan moeilik wees om weer gewoond te raak aan die toestande daar.”

Hy het erken dit was ’n verligting om weer in Suid-Afrika koning te kraai vir die eerste keer in meer as drie jaar.

“Dis lekker om uiteindelik weer ’n tuisreeks te wen, maar dis nie asof ons ál ons onlangse reeks hier verloor nie.Ons kon net nie altyd daardie uitklophou plant nie,” het hy gesê.

“Vir my is die belangrikste nie dat ons gewen het nie, maar hóé ons gewen het. Ons het dié keer ons wedstrydplan feitlik perfek uitgevoer en presies gedoen waaroor ons vooraf gepraat het.”

’n Veglustige Smith het ontken dat hy enige planne het om afstand te doen van die kapteinskap óf dat die keurders se geduld nou opraak met nóg twee hardebaarde, Jacques Kallis en Mark Boucher.

Hoewel Kallis sy kritici verkeerd bewys het met ’n dubbele honderdtal en die Speler van die Wedstryd-toekenning in die Moederstad, is die plekke van Smith en Bouchers steeds onder bespreking ná die treurmare op Kingsmead.

“Dít (gerugte dat Smith gaan bedank) verdien nie werklik eers ’n reaksie nie,” het dié 30-jarige Kapenaar gekap, nadat hy net 118 lopies (teen ’n gemiddelde van 29.50) in die reeks kon aanteken.

“Die seisoen is maar nog kort, maar ek voel nou beter as in ’n baie lang tyd. Ek moes swoeg teen Australië, maar ek het op die oueinde daardeur gekom en ’n honderdtal geslaan.

“Ek het goed gevoel in Durban en my paaltjie hier (op Nuweland) met ’n simpel hou weggesmyt. Ek sal aanhou om hard te werk – en hopelik kan ek daarop voortbou.”

Hy het ook in die bresse getree vir Boucher, wat ’n nagmerrietoets agter die paaltjies beleef en twee verspotmaklike vangkanse verbrou het.

“Ek dink beslis nie dat Mark ’n probleem is in die span nie, want ek kan nie onthou wanneer laas hy ’n vangkans voor dié toets verbrou het nie,” het Smith gesê.

“Die uitdaging elke seisoen is om van krag-tot-krag te gaan; tog voel dit asof baie mense probeer fout vind die laaste paar weke – of ons nou wen of verloor.

“As een speler se oë hom nie in die steek laat nie, is ’n ander een kwansuis oor die muur.”