Hartseer Elgar beseer, uit eendagreeks

Die belowende hotklou-kolwer Dean Elgar se Protea-drome lê aan skerwe weens ’n kniebesering.

Elgar het die besering Vrydag in Kimberley in die Knights se SuperSport-wedstryd teen die Cape Cobras opgedoen.

Hy was een van twee nuwelinge in die nasionale groep vir die eerste twee wedstryde van die kitsreeks teen Sri Lanka.

Elgar sal in alle waarskynlikheid ’n operasie moet ondergaan, wat beteken dat hy dalk nog ’n hele ruk sal moet wag om weer oorweeg te word.

“Dit was vir my net so ’n skok soos vir almal. Dis sommer goor,” sê Elgar, wat gister op die laaste dag reeds terug Bloemfontein toe gestuur is.

Hy was oor die jare geduldig en het geglo sy kans sal kom as hy volhard.

Elgar (24) is toe beloon, nadat hy dié seisoen die top-kolwer (meeste lopies én beste kolfgemiddeld) in die plaaslike eendagreeks was.

Hy het werklik uitgesien om sy droom te verwesenlik – hy was vol planne om tydens vandeesweek se wedstryd in Kimberley bykomende skaafwerk in die nette te gaan doen.

Hy sal nou nie môre saam met die nasionale groep kan saamtrek nie.

Elgar sê hy het die besering opgedoen toe hy geboul het, tussen aflewerings toe hy gebuk het om die bal op te tel.

“Ek dink dit was met die vierde bal van die boulbeurt. Toe ek buk, toe voel ek daar gaan iets.”

Dié draaier het nog ’n bal afgestuur, maar het toe nie die boulbeurt voltooi nie. Hy het ná die vyfde bal van die veld af gestap. Die span se fisioterapeut se aanvanklike bevinding was dat hy sy knieskyf (meniskus) beseer het.

Een van die nasionale keurders, Corrie van Zyl, het die wedstryd bygewoon.

Elgar het die keurderbaas Andrew Hudson ook gister gekontak om hom van die toedrag van sake te verwittig.

Elgar het Dave Miller in die nasionale groep vervang.

Die Proteas se bestuurspan het gister nog gewag op ’n mediese verslag omtrent Elgar se besering.

Elgar was by ’n dokter, maar die spesialis wat gewoonlik betrek word met kniebeserings was nie beskikbaar nie.

Die ideale plaasvervanger vir Elgar sou Colin Ingram wees, wat die afgelope ruk uitstekend op dreef vir die Warriors was. Ook hý sit met ’n besering. Hy het sy skouer vandeesweek in Benoni in die wedstryd teen die Titans beseer. Hy het negende in hul eerste beurt gekolf maar gister weer vyfde.

Die internasionale kitsreeks begin Woensdag in die Paarl.
Die insluiting van die gevreesde snelbouler Lasith Malinga in die toerspan se groep kan die SA kolwers laat rondskarrel.