Mbalula: Majola is desperaat

Gerald Majola se besluit om uit sy tugverhoor te stap én sy gevolglike dreigement om Krieket Suid-Afrika (KSA) in die arbeidshof te pak, “wys hoe desperaat dié geskorste krieketbaas nou is”.

Só het die sportminister, Fikile Mbalula, teruggekap nadat Majola Woensdag uit KSA se kantore in Johannesburg gestorm het op die eerste dag van die verhoor, wat reeds maande lank sloer.

Majola is in Maart geskors as KSA se uitvoerende hoof weens die sowat R1,8 miljoen se ongemagtigde bonusgeld wat hy ontvang het vir die aanbieding van die Indiese Premierliga-toernooi en die Kampioenetrofee-reeks in 2009.

’n Ondersoekkomitee, onder leiding van oudregter Chris ­Nicholson, het bevind Majola het die Maatskappywet oortree deur dié bonusse nie te verklaar nie.

Majola het Woensdag gedreig om KSA na die arbeidshof te sleep, aangesien Mbalula “sy mandaat oorskry het” met die aanstelling van die Nicholson-komitee.

Hy het Mbalula ook vergelyk met die destydse apartheidsminister John Vorster.

“Dié vergelyking is belaglik en verdien om met minagting verwerp te word,” het Mbalula gesê.

“Hy (Majola) het homself nou gewend tot kinderagtige beledigings, nadat al sy pogings om die tugverhoor vry te spring, van die hand gewys is.

“Ons het beter verwag van hom, maar sy desperaatheid is nou duidelik.”

Majola, wat steeds ’n salaris van meer as R150 000 per maand verdien, het vroeër ’n spesiale pleit gerig aan Karel Tip, die voorsitter van die tugkomitee, om dié verhoor te laat vaar.

Dié pleit is egter van die hand gewys en Majola sal nou in sy afwesigheid verhoor word.