Proteas 'tas mis'

Die Proteas se volgehoue weiering om ’n spesialis-paaltjiewagter vir sy toetsspan te kies, kan die Suid-Afrikaners reeds in Adelaide aan die agterstewe byt.

Só het Ian Healy, die voormalige Australiese paaltjiewagter, vandeesweek gewaarsku aan die vooraand van die tweede toets, wat Donderdag in dié stad begin.

Die toerspan het so byna slae gekry in die eerste toets op die Gabba in Brisbane, nadat sy boulers net vyf paaltjies kon plattrek in die Aussies se tamaai kolfbeurt van 565/5.

“Ek is nog nie oortuig deur AB as paaltjiewagter nie,” het Healy, wat 395 slagoffers agter die paaltjies geëis het in 119 toetse, aan espncricinfo.com gesê.

“Hy was effe gelukkig in Brisbane, want hy het nie veel draaiboulwerk gehad om mee rekening te hou nie, maar dit gaan ’n heel ander storie wees in Adelaide.”

Die 28-jarige De Villiers is in Julie as Mark Boucher se toets­opvolger aangewys en het tot dusver gemengde welslae agter die paaltjies behaal.

Volgens Healy het die Protea-keurders misgetas deur sewe kolwers – waaronder die 28-jarige De Villiers – op die Gabba in te span, eerder as ’n erkende paaltjiewagter.

“Suid-Afrika het geen rede om soveel kolwers te kies nie, want (Vernon) Philander is bedrewe met die kolf en (Dale) Steyn kan ook die wilgerlat swaai as hy moet,” het Healy gesê.

“Hulle kan net sowel ’n spesialis-paaltjiewagter kies, wat sy man sal kan staan op die vierde en vyfde dag van ’n toets wanneer jou draaier ’n span probeer uitboul.

“Ek sal graag wil sien of AB die mas sal opkom as ’n toets op ’n mespunt gebalanseer is en daar is skielik ’n moeilike stonkkans.”

Healy meen ook De Villiers se kolfwerk word reeds deur dié bykomende verantwoordelikheid ingeperk.

“Die Suid-Afrikaanse spanbestuur meen duidelik hy vaar goed genoeg, maar hulle moet baie versigtig wees.

“Dit het reeds sy kolfwerk begin beïnvloed en nie hy óf die Proteas kan dit bekostig om minder lopies aan te teken nie.”

In sewe toetse as paaltjiewagter kon De Villiers nog nét 342 lopies moker – teen ’n beskeie gemiddelde van 34.20 en met net een vyftigtal.

Daarteenoor het dié blondekop Pretorianer in 71 toetse nét as kolwer reeds ’n yslike 5 345 lopies (teen ’n gemiddelde van 50.42) aangeteken.

Dít sluit in 28 vyftig- en 13 honderdtalle en ’n beste telling van 278*.