Pybus moet Cobras laat pik in Pro20
2010-07-10 23:36
- Artikelopsies
- Deel
- Kry Rapport op
Altus Momberg in Kaapstad
Die druk is kwaai op die Cape Cobras se nuwe krieketafrigter, Richard Pybus, om te verseker dat dié span aanstaande seisoen ten minste die eindstryd van die plaaslike Pro20-reeks haal.
Pybus (46), die voormalige Pakistanse en Titans-afrigter, het die afgelope week ’n driejaarkontrak met die Kaapse streekspan gesluit. Hy word môre op Nuweland aan die Kaapse media bekendgestel.
Dit is sy rekord by die Titans as Twintig20-afrigter wat hom die regmerkie bo die Proteas se hulpafrigter, Vincent Barnes, gegee het.
Die Kaapse span is desperaat om vir die finansieel winsgewende Indiese kampioeneliga te kwalifiseer en die vorige breier, Shukri Conrad, se onvermoë om dít die afgelope seisoen reg te kry, was een van die hoofredes waarom hy sy tasse moes pak.
Dis geen geheim nie dat die unie al jare lank geldprobleme het en die miljoene wat in die Indiese reeks verdien kan word, sal dus baie help.
Conrad se span het verlede seisoen die vierdaagse SuperSport-reeks op ’n drafstap gewen, maar al is dié toernooi die opvolger van die gesogte Curriebeker- en Castlebeker-reekse van weleer, tel dit nie veel in ’n wêreld waar Mammon die septer swaai nie.
Pybus het sy afrigtingsloopbaan in die Oos-Kaap begin en het in 1994 die Grens se o.19-span begin brei. Hy is in 1997 tot die senior afrigter in Oos-Londen bevorder.
In 2003 het hy probeer om die onbegonne taak te verrig om Pakistan se vele, reuse ego’s bymekaar te trek voordat hy vanaf die 2005-’06-seisoen groot sukses by die Titans behaal het.
Justin Kemp, die Cobras-kaptein, was vol lof vir Pybus.
“Dis wonderlik om ’n afrigter met Richard se rekord te kan verwelkom. Ek glo vas dat die strukture en dissipline wat hy gaan bring, ons net kan help,” het Kemp gesê.
“Die sukses wat hy by die Titans behaal het, was fantasties. Ons kan hopelik met Richard se hulp ’n ware krag in SA krieket word.”