SA krieket geskud deur bedanking van top-beampte

Nóg ’n opstopper het die vuisvoos Krieket Suid-Afrika (KSA) getref toe een van sy top-amptenare gister skielik bedank het.

Rapport verneem op goeie gesag dat Richard Glover, KSA se kommersiële bestuurder, sy tasse gepak het – met dié beheerliggaam wat steeds sukkel om borgskappe te bekom en skaars twee dae voordat ’n ondersoek na beweerde wanbestuur teen sy uitvoerende hoof, Gerald Majola, in Pretoria hervat word.

Glover is in Mei voorverlede jaar in dié pos aangestel, nadat hy vir meer as ’n dekade lank in die Verenigde Koninkryk werksaam was – onder meer by die prestigeryke Engelse sokkerklub Arsenal in Londen.

Dié Bloemfonteiner was sedertdien aan die hoof van borgskapwerwing vir KSA.

Hoewel daar gisteraand aan Rapport gesê is dat Glover ’n ander werksaanbod ontvang het “wat hy nie van die hand kon wys nie”, is dit geen geheim nie dat hy die afgelope jaar toenemend gefrustreer is deur die sogenaamde bonusskandaal wat dié liggaam reeds sedert Augustus voorverlede jaar ry en die gevolglike ondersoek deur ’n kommissie onder leiding van regter Chris Nicholson.

Fikile Mbalula, die minister van sport, het dié kommissie einde laasjaar op die been gebring, nadat miljoene rande se ongemagtigde bonusse aan Majola en bykans 40 ander KSA-werknemers betaal is vir die aanbieding van die Indiese Premierliga (IPL)-toernooi en die Kampioenetrofee-reeks in Suid-Afrika in 2009.

Dít het verskeie vooraanstaande maatskappye laat kop uittrek uit onderhandelinge en het KSA glo soveel as R60 miljoen gekos, aangesien geen borge gevind kon word vir die onlangse reeks teen Australië nie.

Intussen het Mbalula vandeesweek by monde van ’n woordvoerder gesê Ali Bacher, Majola se voorganger, is een van verskeie mense wat vanaf môre voor dié kommissie sal verskyn.

Majola het laasmaand in trane aan Nicholson erken hy het nie sy bonusse van R1.8 miljoen verklaar soos die Maatskappyewet vereis nie, maar het skaars 24 uur later ’n striemende aanval geloods op Bacher.

Majola het dié voormalige hoof van die destydse Verenigde Krieketraad van Suid-Afrika (VKRSA) onder meer daarvan beskuldig dat hy “gelieg het” oor die bonus van R5 miljoen wat aan hom betaal is vir die aanbieding van die Wêreldbekertoernooi in 2003.

Bacher, wat aan die stuur was van dié toernooi, het by navraag aan Rapport gesê daar was niks “duister” aan dié betaling nie en dat ’n groot gedeelte daarvan sy aftreefonds was.

Hy het ook Majola se bewering, dat sy mediese kostes steeds deur KSA betaal word bykans ’n dekade sedert hy uit dié pos bedank het, ten sterkste ontken én gesê hy is bereid om voor die Nicholson-kommissie te getuig.