Titans, Cobras sal op tuisvelde bordjies moet verhang

christo.buchner@sport24.co.za

Twee halfeindstryde wat eers met die laaste bal beslis is, verseker dat vandeesweek se tweede kragmetings in die halfeindronde van die Pro20-krieketreeks lippelek-stryde sal wees.

Die Titans en Cobras sal op hul tuisvelde die bordjies moet verhang teen onderskeidelik die Lions en die Warriors om ’n beslissende stryd af te dwing voor die twee spanne in die eindstryd gefinaliseer word.

Nadat die Lions vroeër in die week ’n ses van die laaste bal geslaan het om die Titans op die Wanderers te klop, kon die Cobras hulle dit Vrydagaand nie nadoen nie.

Soos die Lions het hulle vier lopies van die laaste bal nodig gehad om die Warriors in die Baai te klop, maar die staatmaker Rusty Theron het kopgehou met die bal in die hand en Robin Peterson buite die wegpen geklop.

Die Cobras, wat 150 moes kry om te wen, het op 146/8 geëindig, met twee paaltjies wat in die laaste beurt, waarin agt benodig was, geval het.

Die jong linkskolwer Colin Ingram (60*, 41 balle, 5x4, 3x6) was oudergewoonte die man met die breë kolf vir die Oos-Kapenaars.

Hy is goed ondersteun deur sy kaptein, Davy Jacobs (42*, 32 b, 1x4, 2x6). Dit was die 91 lopies wat hulle van die laaste nege beurte geslaan het wat die knoop vir die Warriors deurgehak het.

Die Titans se afrigter, Chris van Noordwyk, het die versekering gegee dat sy span sal vergoed vir die glips teen die Lions.

“Dit was baie teleurstellend, maar ons sal dié week hard daaraan werk om die foute wat ons die wedstryd gekos het, reg te stel,” sê hy.

Wat die besluit betref om David Wiese die laaste boulbeurt te laat boul, nadat die bal reeds aan Ethy Mbhalati gegee is, sê Van Noordwyk: “Daardie besluit is deur die kaptein (Pierre Joubert) op die veld geneem.

“Hy het sy keuse gemaak en ek ondersteun hom ten volle daarin.

“Daar is geen skuld voor enigeen se deur te lê nie,” sê hy van die 19 lopies wat Wiese afgestaan het in dáárdie beurt en die Titans die wedstryd gekos het.

Jean Symes (30*), wat ’n ses en ’n vier in daardie beurt gemoker het voordat Robbie Frylinck die wenlopies met ’n ses van die laaste bal geslaan het, het eintlik ook maar heel toevallig gespeel.

Hy het bloot in die span ingekom nadat Dane Vilas weggelaat is toe hy aangedui het hy gaan aanstaande seisoen na die Cape Cobras en het ’n kontrak met die Kapenaars gesluit.

* Die Cobras en Warriors speel Woensdag in Kaapstad en die Titans is Vrydag tuis in Centurion teen die Lions.

Wen die twee tuisspanne, sal daar aanstaande Maandag, in onderskeidelik Port Elizabeth en Centurion, beslissende wedstryde gespeel moet word om te bepaal wie uiteindelik die eindstryd haal.

- Rapport