Vergeet knoeisage, pleit Paki-kaptein
2012-01-14 23:42
- Artikelopsies
- Deel
- Kry Rapport op
Die ou mense het mos gesê dis moeiliker om daar bo te bly as wat dit was om daar te kom.
Dís die uitdaging wat vanjaar op die Engelse krieketspan wag.
Andrew Strauss en sy makkers het ’n annus mirabilis in 2011 in toetskrieket beleef.
Hy het ses van die agt toetse waarin hy gespeel het gewen, terwyl die ander twee onbeslis geëindig het.
Hy het beheer van die eerste plek op die Internasionale Krieketraad (IKR) se ranglys vir toetsspanne geneem, nadat hy Indië op tuisbodem verneder het.
Daar is egter nog twee berge wat Engeland moet klim voordat hy homself rêrig as die beste toetsspan in die wêreld kan kroon: hy moet meer reekse op die subkontinent wen en hy moet in Julie en Augustus vir Graeme Smith en sy Proteas pak slae gee.
Engeland het sedert die begin van 2008 maar net vier wedstryde op die subkontinent gespeel.
Hy het ’n reeks teen Bangladesj gewen en een teen Indië verloor.
Strauss-hulle het ook in die 2004-’05-seisoen laas vir die Proteas getroef.
Sedertdien het Suid-Afrika ’n reeks in Engeland met 2-1 gewen, voordat dié spanne die reeks in Suid-Afrika in 2009-’10 gedeel het. Maar selfs in dáái reeks het die Proteas drie van die vier toetse oorheers.
Engeland het vanjaar ’n druk program, wat Dinsdag in Dubai begin met die eerste van drie toetse teen Pakistan.
Dan volg daar in Maart twee weg-toetse teen Sri Lanka en drie toetse teen die Wes-Indiese Eilande in Mei en Junie.
Die gróót reeks is egter in Julie, wanneer die reeks van drie toetse in Engeland teen Suid-Afrika begin. Engeland is nou ’n baie beter span as wat hy in 2008 was – en dit gaan beslis ’n kookwater-reeks wees. Suid-Afrika sal sy wisselvalligheid by die huis moet los, maar as Dale Steyn, Morné Morkel en Vernon Philander boul soos hulle kan, gaan Suid-Afrika nie ’n maklike prooi wees nie.
Engeland sal vir eers wil vergeet van die Proteas en hoop dat hulle Pakistan in die komende reeks kan troef.
Die kolfblaaie in Dubai en Abu Dhabi is berug as morsdood – en Engeland se boulers sal moet wys dat hulle net soveel sukses op sulke blaaie kan behaal as wat hulle op die boulersvriendelike blaaie in Engeland kan kry.
Engeland het in Alastair Cook en Jonathan Trott twee van die beste toetskolwers in die wêreld; hulle vorm die grondslag van die Engelse aanslag.
Pakistan probeer steeds om te herstel van die knoeiery-skandaal van 2010 waar hy twee van die wêreld se beste naatboulers, Mohammad Amir en Mohammad Asif, aan langtermynskorsings verloor het.
Dié drie is laasjaar boonop tronkstraf opgelê nadat ’n Britse poniekoerant hul plan – om met opset foutballe af te stuur tydens voorverlede jaar se vierde toets teen die einste Engelse op Lord’s – oopgevlek het.
Misbah-ul-Haq, die Pakistanse kaptein, het juis met sy aankoms daar gevra dat Engeland asseblief die knoeiery skandaal moet vergeet.
“Ek dink albei spanne weet dat ons die verlede moet vergeet. Ons gaan net probeer om goeie en eerlike krieket te speel,” het Misbah aan ESPNCricinfo gesê.