Khotso Mokoena is nou amptelik die Suid-Afrikaanse atleet
wat die meeste medaljes ooit op wêreldkampioenskapsbyeenkomste gewen het.
Mokoena, wat verlede jaar 25 jaar jonk geword het, het
gister sy sesde internasionale medalje in sy redelik kort loopbaan gewen.
Hy was in Doha, Katar, by die binnenshuise
wêreldkampioenskappe tweede in die verspring, toe hy sy soveelste keer deur die
8 meter-grens gegaan en op 8.08 geland het.
Khotso het die titel verdedig wat hy twee jaar gelede in
Valencia gewen het.
Gister het die Australiër Fabrice Lapierre goud met ’n
sprong van 8.17 gewen. Dít was Lapierre se vyfde sprong – en, soos ’n mens al
van Mokoena gewoond geraak het, het hy met sy sesde en laaste sprong álles
ingesit vir daardie 8.08, wat ook sy beste vanjaar is.
Mokoena se ander spronge was 7.86, geen sprong, 7.76, geen
sprong en 7.90.
Dis die derde agtereenvolgende keer op ’n byeenkoms soos
dié dat hy net-net nie met goud bekroon is nie. Hy was verlede jaar in Berlyn by
die (buitemuurse) wêreldkampioenskappe ook tweede, soos hy in 2008 in Beijing
óók silwer by die Olimpiese Spele gewen het.
Met die ander Suid-Afrikaners het dit nie so voor die wind
gegaan nie.
Juan van Deventer, wat op die grens van Johan Landsman se
stokou SA rekord in die 1 500 boer, het gister in dié item sesde geëindig in ’n
duidelik taktiese wedloop.
Die verdedigende kampioen, Deresse Mekonnen van
Ethiopië, het in ’n betreklike stadige tyd van 3:41.86 gewen – net-net voor die
Marokkaan Abdalaati Iguider (3:41.96) en die Keniaan Haron Keitany (3:42.32).
Van Deventer se tyd was 3:43.77.
René Kalmer was in die eindstryd van die 3 000 vir vroue
negende in 9:04.11 – in nóg ’n langasem-item wat totaal deur Afrika oorheers is.
Meseret Defar (Ethiopië) het in 8:51.17 gewen, met ’n Keniaan tweede en nóg ’n
Ethiopiër derde.
Gisteroggend is Janice Josephs in die kwalifiserende ronde
van die verspring uitgeskakel.
Janice was 21ste met ’n 6.02, met die Portugees
Naide Gomes die beste (6.61).
Die voormalige Suid-Afrikaner Karin Mey is óók uitgeskakel.
Karin, wat nou vir Turkye onder die naam Mey Melis deelneem, was 14de
(6.36).
Internasionaal het die omstrede Britse opkikker-gebruiker
Dwain Chambers gister in die 60-eindronde hakskene vir die (onbekende)
Amerikaanse en Jamaikaanse blitse met ’n wentyd van 6.48 gewys.
Die Australiër Steven Hooker het die paalspring met ’n puik
6.01, ’n kampioenskapsrekord, gewen, terwyl die Amerikaanse gewigstoot-reus
Christian Caldwell met ’n yslike 21.83 baas was.
Blanka Vlasic was in die hoogspring met ’n 2.00
koningin.