Absa: Plek van aktuarisse, tellers en agterlyn-foendi’s
2010-09-20 09:45
- Artikelopsies
- Deel
- Kry Rapport op
Mensig, maar dinge kan morsig raak so langs die atletiekbaan.
Die Mol verwys nie nou na sy gasbraaiertjie en gedokterde energiedrankies wanneer hy en sy vrinne gaan kyk hoe ons land se voorste vroue-atlete hul beste bene voorsit nie. Nee, hy verwys eerder na daardie (eens) trotse vereniging wat homself ASA noem en hoe hulle nou al weer met vuil spuitnaalde die sport besmet wat hulle veronderstel is om te dien.
Soveel van verdagmakery en slegpratery en opstokery het die Mol laas voor ’n politieke kongres in Polokwane beleef.
Hopelik vee die nuwe besems wat gister verkies is die tartan behoorlik skoon en kan atletiek weer sy regmatige plek in ons besige skedules en harte inneem.
Een van die Mol se vrinne wonder egter: Moes ASA nie maar eers ál daardie tugsake en finansiële ondersoeke na sy vorige regime afgehandel en die skuldiges gestraf het nie? Sodat diegene wat gister gestem het, al die feite op die tafel gehad het.
Die Mol het ’n sterk vermoede daar wag nog ’n paar Chuene-skokke. Hopelik is niemand wat ’n vinger in enige van dáárdie pasteie gehad het, gister ingestem nie. Want dan begin alles maar net weer van voor af.
Gelukkig is Absa se voorskrifte aan SA Rugby darem ’n eerste, verseker ons rugbybaas, Oregan Hoskins, die Mol en sy gereelde dop-en-tjop-maats.
Dié borg het mos vir Regan-hulle laat weet hulle is erg beswaard oor die blekerige gelaatstrekke van die spanne in die Absa-Curriebeker-reeks.
Sulke inmenging maak die Mol ook blekerig om die kiewe, maar eerder oor die arrogansie van die mense by wie die Mol toevallig ook ’n paar swaarverdiende randjies belê.
Nou verstaan die Mol dat van daardie swaarverdiende geldjies ook nog gebruik gaan word om die Bok-trui vir die volgende vyf jaar op te kikker.
Dit laat die Mol wonder: Wie by Absa is die rugbykenners wat weet hoekom die Bulle en Cheetahs en Leeus die spanne kies wat hulle kies? En dan besluit dit is verkeerd en kort ingryping?
Is die bankgroep se kenner van fiskale beleid ook ’n ghoeroe in agterspel? Of is dit een van die tellers op Odendaalsrus wat die groep oor lynstaantekens adviseer?
Dit is nogal belangrik vir die Mol om te weet wie by Absa meen hy kan SA Rugby vertel hoe sy unies se agterlyne en agttalle moet lyk, want dan kan ons, as hulle ook die Bokke se borg word, dieselfde ou(ens) vra om vir Snorre te help met die Bok-span se samestelling!
Wonder net hoe dit gaan werk? Kies die borg eerste sy “moet in wees” en gee dan vir Snorre kans vir sý sleutelspelers? Of word Snorre toegelaat om eers sý ‘moet in wees” te kies en dan kan Absa die res inkleur?
Die Mol se vrinne wil natuurlik ook weet of Absa dieselfde brief sokker toe gestuur het oor die gebrek aan reënboogkleure in dáái spel. Maar die Mol het hulle oortuig dat so ’n brief nié nodig is nie. Net soos die een aan SA Rugby ook onnodig was.
Nogtans het dit die Mol aan die wonder gesit oor daardie polis wat binnekort loskom en hy juis by ’n spesifieke bank wou gaan belê ...