Amla: ‘Ek kan nóg beter’
2010-02-20 23:35
Suid-Afrikaanse krieket-ondersteuners sal vergewe word as hulle glo dat Hashim Amla tans ’n krieket-superheld is ná sy ongelooflike vertonings in die toetsreeks teen Indië ... maar dié nederige Durbaniet glo dat hy nog baie kan verbeter.
Amla, wat drie honderdtalle in sy drie kolfbeurte in die toetsreeks aangeteken het, sê aan Sport24: “Elke krieketspeler droom van ’n reeks soos dié waar alles vir jou reg verloop.
“Ek was ook effens gelukkig, deurdat ek ’n hele paar lewens met verbroude vangkanse gegun is.
“Ek kan nog beter. Jy raak net beter as jy in meer en meer toetse speel.”
Dis insiggewend dat Amla, ondanks al sy sukses, sy kop op die grond hou.
Toe een van die plaaslike joernaliste hier in Indië hom gevra het of hy homself met die wêreld se voorste nr. 3-kolwers soos die Australiese kaptein, Ricky Ponting of die Indiër Rahul Dravid kan vergelyk, het hy vinnig sy kop geskud.
“Hulle het albei hope lopies behaal en hulle het ook albei in meer as 100 toetse gespeel. Dis onregverdig teenoor hulle om my naam saam met hulle s’n te gebruik.”
Hashim het ’n bykans ongelooflike 490 lopies in die reeks aangeteken en is net een keer, in die eerste beurt van die tweede toets, deur die Indiese boulers uitgekry.
Hy het meer as ’n duisend (1033) balle in die reeks getrotseer en het net duskant 24 uur lank gekolf.
Dis verstommend as ’n mens terugdink daaraan dat daar ná die Kers-toets in 2004 in Durban bespiegel is dat hy met sy tegniese probleme nooit die mas gaan opkom in toetskrieket nie.
Hy het hom sedertdien nie net as ’n staatmaker op nr. 3 in die Proteas se kolflys gevestig nie, maar hy is nou ook een van die senior spelers in die span en hy word as ’n opvolger vir Graeme Smith as SA kaptein bestempel.
;?Amla, wat die Dolphins in plaaslike krieket as ’n 21-jarige aangevoer het, het die laaste drie jaar een van die bestendigste spelers in krieket geword. Hy het sedert die begin van 2007 2 879 lopies in toetse teen ’n gemiddelde van 55.36 gemoker.
Dit het 9 honderdtalle ingesluit. Hy het nou ook sy toetsgemiddelde tot 47.26 opgestoot.
- Rapport