Terwyl sy spanmaats
die afgelope week hul bene stompies gehardloop het in Brasilië, het Benni
McCarthy gisteraand die eerste treë gegee op sy pad terug na die Suid-Afrikaanse
Wêreldbekerspan.
Dié enigmatiese
doelskieter was gister op Stamford Bridge op die bank vir West Ham United in hul
Engelse Premierliga-wedstryd teen Chelsea. Hy het nie gespeel nie en Chelsea het
met 4-1 gewen.
McCarthy (32), wat
reeds 32 doele in 78 verskynings in die Groen-en-Goud aangeteken het, het op 6
Februarie ’n kniebesering opgedoen in sy eerste wedstryd vir die Hammers en hy
kon eers die afgelope week weer begin oefen.
“Ons almal hoop dat hy
betyds sal herstel om hom vir die kamp in Duitsland of terug in Suid-Afrika by
ons te kan aansluit,” het die verdediger Matthew Booth die afgelope week vanuit
Brasilië gesê.
Die Bafana Bafana slyp
in die prentjiemooi Granja Comary, net buite Rio de Janeiro, ter voorbereiding
van WB 2010, wat oor net minder as drie maande afskop.
“Benni is ’n legende
in Suid-Afrikaanse sokker en sy teenwoordigheid sal bepalend wees vir ons kanse
in die toernooi.”
McCarthy is een van
minstens tien Suid-Afrikaanse spelers wat, weens verpligtinge by hul Europese
klubs, nie dié moordende kamp kon bywoon nie.
Terselfdertyd het die
afrigter, Carlos Alberto Parreira, en die span se fiksheids-afrigter, Francisco
Gonzalez, die res van die aanspraakmakers op ’n plek in die uiteindelike groep
van 23 spelers behoorlik laat bloed sweet.
“Vir die eerste week
het ons die spelers se weerstand afgebreek om presies te weet waar elkeen staan.
Ons het dié week gimnasiumwerk gedoen, op die veld geoefen en gedraf –?en van
volgende week af sal ons die intensiteit selfs verder verhoog en op
vaart-oefeninge konsentreer,” het Gonzalez gesê.
“Dis moeilik, maar die
spelers is baie gemotiveerd en wil hul kleim afsteek op ’n plek in die
uiteindelike span.” Volgens hom is die huidige fiksheidsvlakke
“onaanvaarbaar”.
“Ná die kamp sál die
spelers fiks wees en weet hoe dit voel om gestraf te word, want die Wêreldbeker
is ’n uitmergelende ervaring.”
;?Intussen het
Parreira gesê die Bafana sal in nóg ’n oefenwedstryd, môre teen die klubspan
Boavista, speel. Die Bafana het gisteraand teen Volta Redonda litte losgemaak en
sal in nóg vier wedstryde (teen Fluminense, Cruzeiro en Botafogo), asook teen
die hoogaangeskrewe Paraguay te staan kom.
“Ons het ál die
oefening nodig wat ons kan kry, want dit sal hopelik die spelers duidelik laat
verstaan wat daar van hulle verwag word,” het Parreira gesê.
“Dié is die wieg van
wêreldsokker, met groot Brasiliaanse spelers wat al hier geoefen het. Hopelik
dien dit as inspirasie.”