Benoude Griekwas sug verlig oor vyf punte
2010-09-18 21:55
Griekwas het 5 punte teen die Luiperds gesoek, en dit toe gekry – maar dit was so hittete of die span van Potchefstroom het Vrydagaand hier hul eerste Curriebeker-oorwinning in bykans twee jaar behaal.
Die Poubloues het eindelik met 29-20 gewen, maar daar was ’n paar benoude oomblikke na die einde toe. Trouens, as die Noordwesters se losskakel, Clayton Durand, met die telling op 22-20 in die tuisspan se guns ’n strafskop deur die pale gejaag het, sou dit dalk net die laaste opdraand gewees het wat die perd flou gemaak het.
Maar Durand het sy skop vier minute voor die einde verby die regterkantse regoppaal getrek – en dit was die laaste sien van die blikkantien vir die besoekers. Kort daarna het Griekwas se heelagter, Riaan Viljoen, in die doodsnikke onder die pale vir sy tweede drie oorgeduik en die wedstryd beklink.
Dié kragmeting sal in die Luiperds se geskiedenisboeke opgeteken word in daardie bra leë kolom getiteld: Wedstryde wat ons moes gewen het. Want as daar nou ooit ’n wedstryd was waarin die besoekers na die gunsteling gelyk het, was dit Vrydagaand s’n. Hulle het van meet af ingeklim en was rustyd welverdiend met 17-15 voor, danksy twee goeie drieë deur die senter Walter Venter.
Viljoen en die flank Johan van Deventer het in die eerste helfte elkeen ’n vyfpunter bygedra, maar dit was asof die tuisspan net nie aan die gang kon kom nie. Hulle het hul in die tweede helfte reggeruk en ’n drie deur Justin Downey en Viljoen se tweede het daardie belangrike bonuspunt verseker.
Griekwas se afrigter, Dawie Theron, was agterna verlig dat sy span met ’n voltal punte van die veld gestap het. Veral met die oog op die wedstryd volgende week in die Kaap teen die WP, sal Griekwas tevrede voel dat hulle steeds vir iets meer as net trots speel, met hul kans om tot die halfeindronde van die reeks deur te dring wat nog in die weegskaal is.
“Ons is verlig om die 5 punte te kry. Daar was in die aanloop tot die wedstryd baie negatiewe berigte oor Griekwas en dit het ons voorbereiding vir die kragmeting beïnvloed. Ons weet ons kan nie joernaliste manipuleer om te skryf wat ons pas nie, maar dit het ongetwyfeld groot stres op die spelers geplaas,” aldus Theron.
Griekwas kom Vrydagaand op Nuweland teen die Streeptruie te staan, terwyl die Luiperds tuis in Potchefstroom die Blou Bulle die stryd aansê.