Blitzkrieg
2010-03-06 22:10
marizanne.kok@sport24.co.za
Die spreekwoord lui dat die ware karakter van ’n man nie gemeet moet word aan hoe hard hy val nie, maar aan hoe vinnig hy daarna opstaan.
Met dít as maatstaf kon Gregg Clark, die afrigter van die Suid-Afrikaanse manshokkiespan, homself en sy jong span maar gistermiddag op die skouer klop.
Net 48 uur nadat die Suid-Afrikaners die grootste loesing in die geskiedenis van die Wêreldbeker-toernooi op die lyf geloop het toe hulle met 0-12 teen Australië verloor het, het hulle die bordjies met ’n onverwagse oorwinning oor die Asiese reus Pakistan verhang.
Kaptein Austin Smith en sy spanmaats het hul eerste oorwinning ooit oor Pakistan behaal deur hom met 4-3 te oortref. Dit was die land se eerste oorwinning ooit oor die Asiërs en boonop die eerste keer sedert 2002 dat Suid-Afrika ’n Wêreldbeker-wedstryd kon wen.
Die Pakistani’s is geen hierjy’s in wêreldhokkie nie. Hulle het die Wêreldbeker in 1994 gewen en is sewende in die wêreld – ses plekke hoër as Suid-Afrika op die ranglys.
Maar die Suid-Afrikaners het hulle min daaraan gesteur. Dis natuurlik verstaanbaar – as jy twaalf doele in ’n enkele wedstryd afstaan, kan dit waaragtig nie slegter met jou gaan nie. Ná Donderdag se treurmare teen Australië het Suid-Afrika gister niks gehad om te verloor nie.
Dis waarskynlik presies wat Clark in lemoentyd vir sy spelers gesê het. Hulle was rustyd met 1-0 agter en met tye lusteloos op die aanval.
Maar wat ook al in die ruskans gesê is, het ’n vuurtjie aangesteek en gelei tot ’n blitzkrieg van drie doele in ses minute, wat net vier minute ná halftyd afgeskop is deur Gareth Carr, wat sy span se eerste doel van ’n korthoek in die toernooi aangeteken het.
Drie minute later het Ian Healy sy naam op die telkaart gekry en kort daarna ook Taine Paton, nadat hy die fynste van randjies bygekry het om ’n aangee teen die agterkant van die doelhok vas te deflekteer.
Toe Marvin Harper ’n beweging wat in sy eie halfgebied begin het in die 55ste minuut afrond, was die telling 4-1 en die koeël deur die kerk. Pakistan het met vyf minute oor teruggeveg en twee doele aangeteken.
Die uitslag was nie genoeg om Suid-Afrika te lig van die onderste plek in Groep B nie, maar dit sal hulle selfvertroue gee voor hul laaste groepwedstryd, môre teen Indië.
- Rapport