Chiefs te swak vir klipharde Crusaders
2010-03-13 23:19
Daar was sulke stories dat die Chiefs – in die lig van hul plek in die eindstryd verlede jaar – deesdae die voorste van die Nieu-Seelandse spanne in die Super14 is.
Maar dis bog. Die Crusaders is, op hul tradisioneel onskouspelagtige wyse, steeds die standaard waaraan spanne gemeet word.
Dis nie eens meer ’n vreesaanjaende span Crusaders wat Christchurch deesdae in die veld stoot nie, maar hulle het die outydse ongenaakbaarheid wat reeds sewe Super-titels na die Suid-eiland laat gaan het. Vrydag het hulle die Chiefs versmoor, hoewel die weer gehelp het.
Met die wind in sy blaaie het Daniel Carter die eerste helfte gedikteer, maar die Chiefs het minder voordeel uit die elemente getrek toe dit met die draaislag begin sous het.
Die Crusaders het Hamilton toe gegaan sonder hul gewone skrumskakel, Andy Ellis (harsingskudding), maar sy plaasvervanger, Kahn Fotuali’i, was een van die besoekers se sterre en het albei hul drieë gedruk danksy puik ondersteunende spel.
Die Chiefs was gereeld gevaarlik en enduit binne trefafstand, maar hul drie weg-oorwinnings was half vleiend en op hul tuisveld het twee van die kompetisie se menéér-spanne hulle nou twee naweke agtereenvolgens getroef. Hul reaksie op dié nederlae in die volgende 14 dae sal hul lot in die kompetisie bepaal.
Die Crusaders is onrusbarend. Hulle is nog ver van goed en hul powere lynstaan kan fataal wees, maar dié span is dikwels soos ’n diesel-enjin –?stadig om warm te raak en onkeerbaar daarna.
- Punte: Crusaders 26 (23): Drieë:Kahn Fotuali’i (2). Doelskoppe: Daniel Carter (2). Strafdoele:Carter (4).
Chiefs 19 (16): Drie: Richard Kahui. Doelskop: Stephen Donald. Strafdoele:Donald (4).
- Rapport