Davey wag steeds vir dáái oproep ...
2010-09-18 21:55
Die sleutel tot sukses in Twintig20-krieket is om te sorg dat dinge gebeur, eerder as om te wag dat dit gebeur.
Só sê Davey Jacobs, kaptein van die Warriors en die land se nuutste blits-liefling, nadat sy spogbeurt van 59 lopies van net 39 balle af die Victorian Bushrangers verlede naweek bykans eiehandig tot oorgawe gedwing het in die Kampioeneliga-toernooi.
Ironies genoeg “wag” Jacobs (28) egter reeds vir die grootste gedeelte van ’n dekade vir ’n oproep van die Proteas-keurders – selfs nadat hy die hoogaangeskrewe boul-aanval van die Australiese blitskampioen verrinneweer het.
Jacobs was veral ongenaakbaar teen Dirk Nannes, waarskynlik die voorste Twintig20-bouler ter wêreld.
Dié hotklou-sneltrein se eerste boulbeurt het ’n yslike 17 lopies gekos en was eindelik die grondslag vir die Oos-Kapenaars se sege met 28 lopies.
Dié span het gister teen Nieu-Seeland se Central Stags te staan gekom, nadat hulle vroeër ook maklik met die Wayamba Elevens van Sri Lanka afgereken het.
“Dis frustrerend dat ek nog nie daardie oproep ontvang het nie, want ál wat ek nog altyd wou doen, was om vir Suid-Afrika te speel,” het Jacobs dié week aan Rapport gesê.
“Ek was 17 toe ek vir myself ’n brief geskryf het waarin ek myself belowe dat ek alles binne my vermoë sal doen om dit reg te kry – en ek dra vandag steeds daardie stuk papier saam met my rond.”
Dít was die dag in 1999 toe die Proteas in hul halfeindstryd van die Wêreldbeker-toernooi deur Australië uitgeskakel is, ná die hartverskeurende uithardloop tussen Allan Donald en Lance Klusener.
“Ek het myself belowe dat ’n krieketwedstryd my nooit weer só hartseer sal maak nie en dat, sou ek ooit die kans kry, ek ’n Wêreldbeker vir die land sal wen.”
Jacobs het die Warriors verlede seisoen gelei na hul eerste twee trofeë in die geskiedenis van dié franchise, nadat hy ook reeds sukses behaal het by die voormalige Eagles-span van Corrie van Zyl, wat begin vanjaar as Mickey Arthur se opvolger aangewys is.
“Corrie weet waartoe ek in staat is, maar ek kan nie beheer wat hy en die res van die keurders besluit nie,” het Jacobs gesê.
“Al wat ek kan doen, is om dit vir hulle so moeilik as moontlik te maak om my te ignoreer – en daarom wil ek beïndruk met die kolf, in die veld én met die paaltjiewagter-handskoene.”
En hy hét: met twee van die toernooi se beste vangskote teen die Bushrangers, nadat hy die handskoene moes afstaan aan die Proteas-veteraan en wêreldrekordhouer, Mark Boucher.
“Soos enige ander speler is daar party dae dat ek wonder of ek ooit daardie oproep gaan kry, maar ek het geen behoefte om my heil in Engeland of enige ander plek te gaan opsoek nie,” sê Jacobs.
“Ek sal daarvoor wag tot ek 40 is. Al wat ek vra, is ’n kans, want ek wéét ek sal die span nie in die steek laat nie.”