Dis om van te huil...
2010-09-04 23:59
LOUIS DE VILLIERS IN BLOEMFONTEIN
Drie letters kon seker genoeg gewees het hiervoor, maar kom ons probeer liewer drie sinsnedes om mee af te skop: Te min. Te laat. Aanvanklik te blêrrie traak-my-nie-agtig.
Die Springbokke het gister so hittete nogmaals ’n oorwinning vanaf nêrens beklink, maar hierdie keer het die Wallabies net-net genoeg woema gehad om hul eerste oorwinning in Bloemfontein sedert 1933 en hul eerste in dun lug sedert 1963 te behaal – hoewel hulle duidelik nie die beste span op die veld was nie, was hulle waarde vir hul 41-39, want hulle het immers vir 80 minute aanhou speel, anders as hul gashere.
Hoewel die Bokke wéér mooi terug baklei het ná die draaislag en in ’n stadium 30 onbeantwoorde punte opgestapel het deur die druk te laai en kop te hou, het hulle nie die oorwinning verdien nie.
Daar was vandeesweek geluide dat die “negatiewe” media ’n remskoen is, so kom ons hou die Bok-bestuur gelukkig en probeer u wys te maak hulle het gister hier gewen.
U weet ek lieg – en as ál 45 miljoen van ons vanoggend vir mekaar probeer wysmaak dat die Bokke Australië getroef het, dan lieg ons ál 45 miljoen. Dalk moet die Bok-kamp dít ook vanoggend onthou.
Japanse bofbalspanne wat droogmaak, kom gereeld agterna op die veld om hul ondersteuners verskoning te vra – en dit was gister met rustyd hier so hittete ’n verrassing dat die Springbok-rugbyspan dit nie kom doen het nie.
Tot in daardie stadium was die hoogtepunt van die middag vir hul geesdriftige ondersteuners waarskynlik Dawid Fourie se Kaboemielies, selfs al maak kommersiële Afrikaanse pop hulle groen om die kiewe.
Nes op Loftus verlede week, kan ’n man agterna nie bra anders as om hul durf aan te prys nie.
’n Minder ervare Springbok-span sou so nimmer as te nooit kon herstel van ’n agterstand van 25 punte in net soveel minute nie.
Maar nogmaals moet ’n mens vra: sou ’n minder ervare Springbok-span in die eerste plek so kniediep in die doedoe beland het?
’n Paar ou hande, natuurlik, is altyd nodig, maar waar die Bok-wyses dié seisoen tekort skiet, is dat die ou groenes en die jong groenes nie saam ingespan word nie.
Is die gedagte om ’n jong span Brittanje toe te stuur as kanonvoer?
Gaan ons later vanjaar daaroor kla dat hulle nou weer te min ervaring in die span het? Hoekom nie liewer nou én later ’n sinvolle mengsel van ervaring en gô kies nie, of is dit eenvoudig te moeilik?
’n Mens se hart kramp vir Bryan Habana, ’n skitterspeler wat deesdae beswaarlik na sy eie skaduwee lyk en nogmaals ’n uitjouery moes ontgeld. Dinge gebeur net nie tans vir dié kêrel nie – en iemand moet tog ’n slag aan Bok-keurder en -breier gaan fluister dat die toetsveld nie die plek is om jou selfvertroue te herwin nie.
Hy was egter beswaarlik in die eerste helfte ál probleem.
Die Bokke se lakwerk was só verspot vrot dat die besoekers selde eens nodig gehad het om die bal deur meer as twee fases skoon te maak, alvorens die kritieke bresse geslaan is.
Nogmaals was minder as ’n halfuur nodig vir die toerspan om ’n bonuspunt-drie te behaal – en dis waarskynlik nou tyd om op te hou hande klap oor veggees en liewer hard-op te wonder oor voorbereiding.
Daar is vandeesweek vanuit die Springbok-kamp simpatie met Bees Roux se penarie uitgespreek.
Almal is sweerlik hieroor ontsteld, maar alvorens Peter de Villiers hom op die terrein van Strafsprosesreg begewe, is dit dalk tyd om hom van beter verdedigingspatrone te probeer vergewis.
Voordat die Bokke hier wakker geskrik het en onthou het hulle speel teen ’n deurmekaar vyftiental wat in die Groot Depressie laas in Bloem kon wen, het hulle sweerlik die swakste 40 minute se rugby van hul loopbane saam opgedis.
Daar is die afgelope anderhalwe dekade sulke beteuterde rugby – en erger – deur die Springbokke opgedis, maar nie deur so ’n talentvolle kombinasie as wat ons tans verteenwoordig nie.
Gurthrö Steenkamp se toekenning as Speler van die Wedstryd was dalk ’n tuisdorp-beslissing, maar hy was puik en Victor Matfield het gewys hy’s ver van klaar, al makeer hy dalk ’n ruskansie.
Jy kon nietemin nie anders as om na die Wallabies te kyk en te besef hulle het minder talent in hul geledere nie.
Hoekom lyk hul agterspelers dan soveel flinker as die Bokke s’n?
Hoekom kan Suid-Afrika se gedugter voorspelers nie hul ligter-in-die-broek kombinasie vir ’n hele wedstryd op die agtervoet hou nie?
Nee wat. Swak, Piketberg.
Jy kan nie aldag op jou stukke wees nie, maar hierdie span het nou in ses wedstryde ’n totaal van twee goeie helftes rugby aanmekaar gesit.
En dis, vet weet, nie die media se blêrrie skuld nie.
* Punte:
Wallabies 41 (31): Drieë: Kurtley Beale, James O’Connor, Stephen Moore, Rocky Elsom, Drew Mitchell; Doelskoppe: Matt Giteau (4), James O’Connor. Strafdoele: Giteau, Beale.
Springbokke 39 (13): Drieë: Jaque Fourie, Gürthrö Steenkamp, Jean de Villiers; Doelskoppe: Morné Steyn (3); Strafdoele: Morné Steyn (6).