“Hy het die gewig, die lengte, die skopvoet .?.?. hy het alles in
sy guns,” het De Villiers die afgelope week gesê.
“As jy só ’n groot heelagter het, ontneem jy jou teenstanders die
opsie van skop. Almal weet hy kan die bal met rente terugskop of ’n teenaanval
loods. As hy in die lug om die bal meeding, troon hy ook bo sy teenstanders
uit.
“Frans het al die eienskappe om die perfekte en beste
internasionale heelagter te word.”
Steyn het verlede jaar vir Suid-Afrika in die toetsreeks teen die
Britse en Ierse Leeus, sowel as in die Drienasiesreeks as heelagter
geskitter.
Hy het hom intussen by die Franse klub Racing Metro aangesluit,
waar hy binnesenter speel.
“Hy het uit ’n Bok-oogpunt die verkeerde besluit geneem om
Suid-Afrika te verlaat, maar dit was dalk vir hom die regte besluit uit ’n
finansiële oogpunt en om meer volwasse te word. As hy my egter môre bel en sê hy
is terug in Suid-Afrika, sal hy dadelik weer in aanmerking vir die Bokke kom,”
sê De Villiers.
Die Bok-breier het onlangs gesê dat hy Suid-Afrika se eerste toets
vanjaar teen Wallis (op 5 Junie in Cardiff) as eenmalige proewe wil gebruik om
te kyk watter oorsese Springbokke dalk in 2011 se Wêreldbeker-toernooi nog vir
die Bokke ’n rol kan speel.
De Villiers wil oorsese Bokke wat in sy planne is vir die
Wêreldbeker-toernooi, oorreed om aanstaande jaar hul rugby in die Super15-reeks
te speel.
Steyn is egter nie van voornemens om voor middel 2012 na
Suid-Afrika terug te keer nie.
“Frans is ’n lojale Suid-Afrikaner en ’n speler wat daarvan droom
om die Springbok-trui te dra, maar nie ten koste van die onderneming wat hy vir
sy Franse klub gegee het om tot 2012 by hulle te bly nie,” het Steyn se agent,
Gerrie Swart, die afgelope week aan Sport24 gesê.
Steyn was verlede seisoen verreweg Suid-Afrika se beste
heelagter.
De Villiers is op rekord dat hy slegs ’n speler van oorsee sal kies
indien die betrokke individu noemenswaardig beter is as enigiemand wat in
Suid-Afrika speel.
Hopelik sal hy Steyn in hierdie lig beoordeel.
;Steyn is intussen deur die Barbarians
genooi om vir hulle op 30 Mei teen Engeland in Londen en op 4 Junie teen Ierland
in Limerick te speel.
Die Barbarian-wedstryd teen Ierland is ’n dag voor Suid-Afrika se
toets teen Wallis.
Die senter Jean de Villiers, wat vir Munster in Ierland speel, is
ook in die Barbarians se planne vir hul wedstryd teen Ierland.
De Villiers en die Bok-keurders sal dus vinnig moet besluit of
Steyn en De Villiers in in hul Wallis-planne is.