Haaie kook in pienk
2010-09-18 21:54
Dit was gistermiddag pienk plesier hier in die Haaitenk.
Die Haaie het hul voorsprong van agt ligapunte in die Curriebeker-rugbyreeks in stand gehou deur die Cheetahs met 30-16 te klop, nadat hulle rustyd met 18-9 voorgeloop het.
En dié keer het hulle darem ook uit ’n siesta in die eerste deel van die tweede helfte wakker geskrik om nog twee drieë te druk.
Die Haaie het gewys dit maak nie saak of hulle in wit of pienk speel nie, hulle kook nog steeds genoeg om bobaas te bly.
Daar was heelwat foute in die eerste helfte, wat net nooit regtig aan die gang kon kom nie.
Dit was so half bedeesd, veral nadat daar vooraf geglo is dit sou ’n oorlog en ’n half wees. Nie een van die twee spanne het gespeel soos hulle kan nie.
Die Cheetah-losskakel, Louis Strydom, het byvoorbeeld sommer vroeg al skeef gekorrel reg voor die pale. Gelukkig het hy enkele minute later daarvoor vergoed met ’n suksesvolle strafskop om die telbord aan die beweeg te kry.
Een Durbaniet wat uitgestaan het, was die flank, Willem Alberts.
Hy is behoorlik soos ’n oorlogstenk wat net een pad ken en dit is vorentoe. Hy het by geleentheid die slot David de Villiers en Jongi Nokwe soos ’n vrot vel afgestamp.
Ook die Durbanse vaskopstut, Eugene van Staden, was uitstekend.
’n Breekslag van hom in die tweede helfte, waarin hy goed 30 meter genael het, was een van die min kere dat die pienk-paviljoene regtig lewe gekry het.
Dié stewige stut is nou nie juis iemand wat jy jou in ’n pienk hemp kan voorstel nie, maar op hierdie spesiale dag vir kanker-bewuswording het hy gekook in dié skakering.
Die Cheetahs het nietemin vir lank in die Haaie se nekke geblaas, en dit het slim dinkwerk van die skrumskakel, Charl McLeod, geverg om ’n behoorlike punteverskil te bewerkstellig.
Met 12 minute oor het McLeod die bal van ’n strafskop op die kwartlyn vinnig getik en tussen die wit truie deurgedartel.
Skielik was die gaping weer nege punte en die pad terug té vol slaggate vir die Bloemfonteiners. Veral met die Haaie wat allesbehalwe soos poeierkwaste in pienk verdedig het.