Malawi-berg lê voor SA netbalspan

2010-03-13 23:19

Die Malawiese netbalspan is op pad en die afrigter van Suid-Afrika se nasionale twaalftal het nou ’n eenvoudige mandaat vir haar verteenwoordigers op die baan.

“Nou is die tyd om ons ware karakter te wys, om ons standaard te lig en te produce. Die tyd vir grappies is verby. Malawi is op pad en ken mekaar so goed dat hulle omtrent met toe oë saam kan speel.

“Ons weet wat op die spel is – ons speel om te kwalifiseer vir ons weergawe van die Olimpiese Spele – en ons sal op ons allerbeste moet wees,” is die mantra waarmee afrigter Carin Strauss haar troepe vir die belangrikste toetsreeks van die afgelope twee jaar sal aanvuur.

Malawi het Maandag bevestig dat hy Suid-Afrika aanstaande maand in Pretoria in ’n toetsreeks van drie wedstryde sal aandurf. Die Proteas, die wêreld se nr. 6-span, moet die vyfde gekeurde Malawiërs klop om deur Saskok toegelaat te word om in Oktober na die Statebondspele te reis.

“Ons is vanselfsprekend verlig dat Malawi ingestem het om te kom, maar ons weet dat daar nou groot druk op ons gaan wees,” het Strauss gesê.

“Ons is rustig. Malawi het baie ondervinding en hul spelers is meer senior as ons s’n, maar ons het ook weer ’n paar ervare spelers teruggekry. Ons sal hopelik skerper as hulle wees, want ons het al vanjaar ’n klompie oefenkampe gehad en die spelers gaan (hierdie week) in die Meriete-toernooi in ’n taai kompetisie betrokke wees.”

Strauss het gesê haar een bekommernis is die gehalte van die skeidsregters wat in dié toetsreeks in aksie sal wees.

“Dis ’n internasionale reeks – en ’n baie belangrike een – en daarom het ons versoek dat die wêreldliggaam top-skeidsregters met baie ervaring hierheen stuur,” sê sy.

- Die wedstryde tussen Suid-Afrika en Malawi sal op 14, 16 en 17 April in Pretoria plaasvind.

- Rapport