Meisie kan AB ‘pootjie’
2010-09-11 23:00
AB de Villiers se nuwe liefde kan hom ’n plek in die Suid-Afrikaanse krieketspan kos vir aanstaande maand se reeks teen Zimbabwe.
Dié 26-jarige Proteas-kolfster is sedert Maandag in Los Angeles in die VSA om by “’n baie spesiale meisie” te kuier – ondanks die vermanings van Krieket Suid-Afrika (KSA) om ’n rehabilitasieprogram tuis te voltooi ná sy onlangse enkel-operasie.
De Villiers – wat pas die Indiese kaptein Mahendra Singh Dhoni onttroon het as die voorste kitskolwer ter wêreld – kon verlede week eers van sy gips ontslae raak en is in ’n wedloop teen die horlosie gewikkel om betyds te herstel vir dié reeks, wat op 8 Oktober in Bloemfontein begin met die eerste van twee Twintig20-wedstryde.
Hy sal egter eers einde vandeesmaand terugkeer van dié stad, waar hy by die beeldskone jong Kapenaar Ashleigh van der Hoven kuier.
De Villiers en Van der Hoven, ’n belowende model en aktrise wat in Los Angeles drama studeer, het vroeër vanjaar in die Moederstad ontmoet en is sedertdien glo “onskeibaar”.
Sy besluit om byna drie weke lank in Amerika vakansie te hou, eerder as om onder die wakende oog van KSA se mediese komitee – en spesifiek die Proteas se fisioterapeut, Brandon Jackson, te herstel, het van die Protea-bestuurslede glo erg omgekrap.
Aan Rapport is gesê dat die span nou “alles in die stryd moet werp” om voor te berei vir die Wêreldbeker-toernooi, wat in Februarie in Indië, Sri Lanka en Bangladesj begin.
De Villiers, wat onlangs ook die eerste Suid-Afrikaner tot nog toe geword het wat benoem is vir die Internasionale Krieketraad (IKR) se toekenning as die ondersteuners se gunsteling-speler ter wêreld, se spanmaats neem tans óf deel aan die Kampioeneliga-toernooi hier óf slyp by hul onderskeie franchise-spanne.
Hy het die afgelope week opgewonde aan vriende – waaronder die Blou Bul- en Bok-losskakel, Morné Steyn, en die Proteas-kolwer Herschelle Gibbs – op sy Twitter-blad vertel van sy vakansie “saam met ’n baie spesiale meisie”.
Mohammad Moosajee, die Proteaspanbestuurder en hoof van KSA se mediese komitee, het by navraag aan Rapport gesê dié talentvolle blondekop is aangesê om sy rehabilitasie in die VSA voort te sit.
“Hy moet twee keer per week ’n spesialis daar raadpleeg, wat dan volledige verslae oor sy vordering aan ons sal stuur,” het Moosajee gesê.
“Ons het aanvanklik gehoop hy sal dalk reg wees om reeds in die Twintig20-reeks te speel, maar dit lyk onwaarskynlik.”
Hoewel Moosajee volgehou het dat daar nie teen De Villiers opgetree sal word nie, het hy erken dat dié uitstappie sy herstelproses kan vertraag.
“As ons gelukkig is, kan hy vir die eendagreeks teen Zimbabwe terugkeer, maar ’n meer realistiese mikpunt is dalk eerder die toer na die VAE (Verenigde Arabiese Emirate),” het hy gesê.
Die Proteas kom einde aanstaande maand in Doebai en Abu Dhabi in ’n blits-, kits- en toetsreeks teen Pakistan te staan.
“Elke speler se besering vereis ’n ander benadering – en in AB se geval is dit dalk ’n goeie ding dat hy ’n bietjie kon wegkom, eerder as om homself hier te frustreer.”