Nóg 'n Bul-treffer
2010-03-13 23:19
Die Bulls stoom voort in die Super14 en hoewel hy gister hier ietwat daarvan verloor het in die tweede helfte van sy wedstryd teen die Highlanders, was daar nooit enige twyfel oor die uitslag nie.
Dit was veral daardie eerste halfuur, waarin die Bulls vier keer gaan druk het en by tye asemrowende rugby gespeel het, waar die penne ingeslaan en die gebiede afgepen is.
Fort Loftus is beveilig en al het die besoekers hoe hard terugbaklei in die tweede helfte, was dié een – die 14de wen in ’n ry – in die sakkie.
Die feit dat die Highlanders vyf keer oor die doellyn is, sou beslis ’n suur smaak in die mond gelaat het, veral omdat die Bulls se verdedigingsafrigter, John McFarland, van mening was dat hulle sekere leemtes uitgeskakel het.
Dié keer was dit die direkte duikslae wat gelol het, met veral Israel Dagg wat die Bulls se lewens vergal het.
By tye het dit twee, drie verdedigers gekos om hom neer te trek en sy driekuns aan drieë was welverdiend.
In totaal is 12 drieë gedruk, maar geeneen was beter as dié van Gerhard van den Heever nie.
Dié 21-jarige vleuel het die bynaam van Shadow en nou weet die Highlanders ook hoekom. Hulle het 70 meter ver sy skaduwee gejaag.
Die Highlanders het met die openingsarsie gevaarlik gelyk, maar Gary Botha het die rekening geopen ná ’n goeie lopie deur Danie Rossouw.
’n Minuut of wat later, ná ’n Pierre Spies-lopie die bres geslaan het, is Francois Hougaard in die linkerkant oor voordat Van den Heever in die regterhoek oor is.
Dagg het self goed 60 meter genael vir sy eerste drie ná ’n Bulls-beweging vanaf ’n lynstaan nié gewerk het nie en die bal deurgeskop is.
Met Zane Kirchner in die agterlyn was daar niemand om te keer nie en sy Highlander-eweknie kon sy span se eerste punte op die telbord kry.
Kirchner het die volgende drie aangevoer. Hy het sy eie hangskop gejaag en die Highlander-ontvanger nie toegelaat om die bal te bemeester nie. Dewald Potgieter het die bal beheer, Derick Kuün gevind en hy het Wynand Olivier in die hoekie oorgestuur vir die Bulls se bonuspunt binne die eerste halfuur.
Die vyfde drie, net ná die halfuur-kerf was sekerlik die maklikste van die klomp.
Die Highlanders kon nie ’n Steyn-hangskop bemeester nie en ná Potgieter weer prominent was, het Stephan Dippenaar Spies deurgejaag vir sy eerste vyfpunter vanjaar.
Spies het in die laaste minute gaan druk om die vyftigtal aan Steyn oor te laat en die skerpskutter het geen probleme daarmee gehad nie.
Daar was nog tyd vir Dagg om sy driekuns te behaal, wéér na redelike lakse keerwerk deur die Bulls, maar die Bulls is steeds bo aan die punteleer.
- Rapport