Pillay lag laaste; 4 atlete in nuwe ASA-raad
2010-09-18 21:54
- Artikelopsies
- Deel
- Kry Rapport op
Aan die einde van ’n stormagtige week waarin sy haarself (onskuldig) in die middel van ’n opkikker-herrie bevind het, het Geraldine Pillay gister laaste gelag.
Dié voormalige nasionale naelloop-koningin is gister op ’n spesiale vergadering van Atletiek Suid-Afrika (ASA) as atlete-verteenwoordiger in die nuwe ASA-bestuursraad van nege lede verkies.
Dít, nadat sy betrek is by ’n opkikker-storie waarin verkeerdelik gesê is dat sy in 2008 in Ethiopië op die Afrika-kampioenskappe met ’n “verbode” middel, Actovegin, ingespuit is op aanbeveling van die destydse nasionale afrigter, die voormalige Oos-Duitse breier Ekkart Arbeit.
Dié middel was in ’n stadium op die verbode lys, maar is daarna afgehaal.
Pillay het gister met onder andere twee ander voormalige sterre – Okkert Brits, Suid-Afrikaanse rekordhouer in die paalspring en Shaun Bownes, SA rekordhouer in die 110-hekkies – afgereken as nuwe atlete-verteenwoordiger.
Pillay was aanvanklik lid van die tussentydse ASA-raad ná die skorsing van die ou Leonard Chuene-regime, maar sy het haar onlangs uit dié tussentydse raad onttrek oor ontevredenheid met die samestelling van die SA span na die junior wêreldkampioenskappe en na die Afrika-kampioenskappe in Kenia.
Gister se verkiesing was inderdaad ’n triomf vir voormalige SA atlete.
Saam met Pillay is ook marathon-koning Hendrick Ramaala en 400-rekordhouer Arnaud Malherbe (as bykomstige lede) en die voormalige langasem-ster Blanche Moila (as voorsitter van landloop) in die nuwe raad verkies.
Die WP se atletiekbaas, James Evans, is met akklamasie as nuwe voorsitter van ASA se baan- en veldkomitee verkies. Ook hy het onlangs uit die tussentydse ASA-raad bedank oor ontevredenheid met die hantering van sekere sake.
Aleck Skhosana van KwaZulu-Natal is die nuwe voorsitter van die padwedlope-komitee, terwyl Motlatsi Keikabile (Noordwes-Noord) en Pieter Lourens (Boland) ook as bykomstige lede verkies is.
Willien Fourie, ’n jarelange staatmaker in SA studente-atletieksake, is beloon vir haar harde werk en sal die SA Studente-atletiekvereniging in die nuwe ASA-raad verteenwoordig.
Tussen die bekendes wat gister nié die paal in die nuwe raad gehaal het nie, tel onder andere die langasem Willie Mtolo, Gauteng-Noord se James Mokoka, Noordwes se Jean Verster, die OP se Godfrey Goliath en die Vrystater Klasie Geldenhuys.
’n Nuwe voorsitter in die plek van Chuene sal later verkies word.