Pumas se spog-losskakel terug na sy wortels
2010-09-18 21:55
- Artikelopsies
- Deel
- Kry Rapport op
“Man, eintlik het ek maar ’n bietjie baie huis toe verlang,” het Elgar Watts, losskakel van die Pumas, aan Sport24 gebieg.
’n Eerlike bieg, wat nes ’n shiraz uit die Paarl op ’n man se tong sy lê in saligheid kom kry – want dit is van dáár dat Watts kom, waar hy getoë is, waar hy verlede jaar die Boland gegroet het. En waarheen hy aan die einde van die Curriebeker-reeks terugkeer.
Watts, ’n oud-leerling van Klein-Nederburg en later ’n Maties-tweedeskakel, het die Boland verlede jaar te midde van ernstige struwelinge in en om die raadsaal vir die Pumas verlaat.
Dié span het onder Jimmy Stonehouse vir die Premierliga van die Curriebeker-reeks gekwalifiseer – die Kavaliers is gerelegeer.
Terwyl die Boland sy huis in orde moes kry, het sake in die SWD se raadsaal nóg meer beroerd geraak.
Nóg ’n Paarliet en belowende losskakel het sy pad toe van daar na Witbank gevind – Ricardo Croy.
“Hierdie kompetisie was baie goed vir ons albei se spel. Wanneer daar nóg ’n speler in jou posisie is, dwing dit jou om ekstra hard te werk om nommer1 te word en daar te bly,” sê Watts.
Terwyl wisselvalligheid nog altyd sy donker skaduwee was, was daar vanjaar meer ligte oomblikke in sy spel.
Dié knaap het lang bene en treë soos ’n resiessprinkaan en maak met ’n gat soos Kimberley – hy kom met diamante vorendag. Vanjaar reeds sewe van hulle.
Teen die Luiperds het hy drie drieë gedruk. En teen die Blou Bulle het hy in die eerste rugbywedstryd in die Mbombela-stadion in Nelspruit vir Wynand Olivier en Kie. in die middelveld gebinne-buite-fop soos ’n koshuiskind in ’n agtermiddag touchies-wedstryd. Vyf punte, dankie!
Só goed kan hy wees, en net so bly is Louis Koen, die oud-Bok en hulp-afrigter van die Boland, om hom terug te hê.
“Ek hoop regtig Rassie Erasmus neem kennis dat hy terugkom Kaap toe. Hy sal perfek pas in die Stormers se struktuur.
“Met Dewaldt Duvenage wat ’n wedstryd met sy voet kan dikteer, sal dit geweldig baie druk van Elgar af haal. Hy is nie by uitstek ’n skoppende losskakel nie, en daarom dink ek hy en Dewaldt sal ’n skitterende kombinasie wees. Man, selfs al betrek hulle hom net in ’n paar vriendskaplike wedstryde, sal dit wonderlik wees.
“Ek kan Elgar se lof nie genoeg besing nie. Hy is na my mening een van die beste losskakels in die land. Met hom en Willie le Roux in die Boland, sal hulle mekaar ook kan druk om die beste te wees. Met hulle sal die Boland vorentoe kan gaan,” het Koen gesê.
“Dit is darem elke spelers se droom om mettertyd Superrugby te speel. Dit is beslis een van my doelwitte vir wanneer ek terug is,” het Watts bygevoeg.
Stonehouse meen skaafwerk aan sy skoppe na die pale toe moet aandag kry, maar dat hierdie speler (wat hy spyt is om te verloor) dit in hom het om op ’n hoër vlak rugby te speel.
Juis daarom is dit net die regte tyd dat sy en Koen se paadjies weer kruis – Koen en nog ’n voormalige Springbok-losskakel Braam van Straaten het ’n skop-akademie.
“Toe Elgar voorheen by die Boland was, het ons nie werklik aan sy skoppe aandag gegee nie, want toe was Justin Peach ons gereelde skopper.
“Elgar is ’n baie goeie aanvallende losskakel, maar hoe gouer ons ook aan sy skoppe kan werk, hoe beter vir sy loopbaan en sommer vir Boland ook,” het Koen gesê.
“Ek het ’n goeie aanbod van die Boland gekry en dit is meer as toe ek daar weg is. Ek sien regtig uit daarna om huis toe te gaan. Dis nuwe spanmaats, ’n nuwe afrigter. En dit is waar my mense is,” aldus Watts.
En die Boland sê: “Tjeers!”