Selfs Tendulkar kon Lions-partytjie nie bederf
2010-09-11 23:00
Vir die meeste van die Lions was eergisteraand se sege teen die Mumbai Indians die hoogtepunt van hul loopbane – maar as dit van Alviro Petersen afhang, wag daar nog heelparty opskuddings in die volgende week of wat.
Dié aanvangskolwer en Lions-kaptein was die nederigheid vanself, nadat sy span die sterbelaaide Indians met 9 lopies geklop het in ’n rillerstryd op die Wanderers, die eerste van vanjaar se Kampioeneliga-toernooi.
“Dit was ’n uitstekende begin en meer as wat ons ooit kon verwag het,” het Petersen agterna gesê.
“Op papier is hulle ’n baie beter span as ons, maar krieketwedstryde word nie op papier gespeel nie. Of ons teen Sachin Tendulkar speel, of teen Jan Alleman, ons speel met dieselfde toewyding.”
Tendulkar het byna die Lions se partytjie bederf met ’n sprankelende 69 lopies, in antwoord op die tuisspan se 186/5 in sy toegelate 20 boulbeurte.
Hy is egter in die 15de boulbeurt van sy span se lopie-jaagtog deur Shane Burger (2/33) verwyder, wat kort daarna ook die onheilspellende beurt van Kieron Pollard (19) kortgeknip het en die tafel gedek het vir die Lions se verrassende sege.
Dít, nadat Asoka de Silva, die Sri Lankaanse skeidsregter, in net die tweede beurt so byna Johannesburg se harte gebreek het deur aan Tendulkar ’n lewe te gun, nadat Ethan O’Reilly hom been voor paaltjie betrap het.
“Dis maar iets wat een of ander tyd met elke bouler gebeur,” het O’Reilly gesê.
“Ek het net die heeltyd vir myself probeer sê dat dit nie Tendulkar voor die paaltjies is nie, maar net ’n doodgewone kolwer. En dit het gewerk.”
Volgens Petersen is die Lions tevrede daarmee om nie veel van ’n wenkans gegun te word nie: “Die media en ondersteuners het die Indians dalk as die oorweldigende gunstelinge beskou, maar ons weet waartoe ons in staat is en het altyd bly glo dat ons kan wen,” het hy gesê.
Vroeër was Jonathan Vandiar (71) en Neil McKenzie (56*) die tuisspan se groot helde.
Dié twee se vennootskap van 64 lopies om die vierde paaltjie het, nadat Petersen, Richard Cameron (9) en Vaughn van Jaarsveld (13) kort ná mekaar die aftog moes blaas.
“Die Lions verdien al die lof,” het JP Duminy, die Indians se Suid-Afrikaanse kolwer, gesê.
“Hulle het uitstekend gekolf en hul boulers was onverbeterlik in die laaste vier boulbeurte. Ons het net weer gesien dat dié ’n spansport is en dat almal moet bydra – ongeag hoeveel supersterre daar in jou span is.”
Petersen-hulle kom vandag reeds op SuperSportpark in Centurion teen die South Australian Redbacks te staan, waarna die Royal Challengers Bangalore en Guyana van die Wes-Indiese Eilande hier slaags is.