Slypkans vir Wêreldbeker

Sy ore het nog skaars opgehou met suis ná die dwarsklappe wat hy en sy Protea-spanmaats verlede maand by Virender Sehwag en Sachin Tendulkar gekry het, of Morné Morkel en ’n dosyn van sy landgenote is reeds terug in Indië – dié keer in die blink vere van hul skatryk Indiese Premierliga (IPL)-spanne.

En hoewel Morkel en sy Rajasthan Royals weer een van die gunstelinge is om die boerpot oor net meer as ’n maand los te slaan, erken dié lenige snelbouler dat hy om ánder redes na dié blitsreeks uitsien.

“Ek sal jok as ek sê dat ’n blaaskans nie lekker sou gewees het nie,” het Morkel vandeesweek, kort voor sy vertrek na Indië, aan Sport24 gesê.

“Maar die IPL is ’n ongelooflike gebeurtenis en die hoogtepunt op baie mense se krieketkalender. Dis boonop ’n laaste kans om onsself reg te kry vir die Twintig20-Wêreldbeker én om ’n plan te beraam vir Tendulkar en Sehwag.”

Die Proteas is weer vroeg in Mei met Indië slaags, wanneer blitskrieket se Wêreldbeker in die Wes-Indiese Eilande plaasvind. Hulle speel enkele dae later in hul enigste ander groepwedstryd teen Afghanistan.

Dié twee was verlede maand die Proteas se grootste pretbederwers in dié span se sukkeltoer in Indië. Morkel-hulle het weliswaar die toetsreeks met 1-1 gedeel, maar met 1-2 in die eendagreeks verloor.

Sehwag het tellings van 109 en 165 in die twee toetse gemoker, terwyl Tendulkar in Gwalior die eerste kolwer nóg geword het wat ’n kits-dubbelhonderdtal aangeteken het.

“Hulle was briljant en ons is nou behoorlik keelvol vir veral Sehwag. Dis asof hy altyd sy beste beurte vir ons hou,” het Morkel gesê.

Sehwag het ook tydens die Proteas se vorige toer na Indië (in 2008) ’n vlekkelose beurt van 319 in die Chennai-toets geslaan.

“Met sulke ouens kan jy dit eenvoudig nie bekostig om selfs die kleinste fout te maak nie. Veral Sehwag kan feitlik enige aflewering vir ’n ses slaan. Ons sal hom fyn dophou met die oog op ons wedstryd teen hulle.”

Die Proteas kon in twee vorige probeerslae nie verder kom as die halfeindronde van die Twintig20-Wêreldbeker nie en Corrie van Zyl, nasionale afrigter, sal die spelpeil van die Suid-Afrikaners fyn dophou om die span se eerste sukses in ’n wêreldtoernooi in meer as ’n dekade te probeer verseker.

Morkel en sy Royals-spanmaat Graeme Smith is so te sê verseker van hul insluiting in die 15-tal, terwyl Jacques Kallis, Mark Boucher, Dale Steyn en Roelof van der Merwe (Bangalore Royal Challengers), AB de Villiers (Delhi Daredevils), Herschelle Gibbs (Deccan Chargers), Charl Langeveldt (Kolkata Knight Riders) en Albie Morkel (Chennai Super Kings) ook maar hul tasse kan pak.

Die Warriors se Rusty Theron kan die enigste nuweling wees, nadat hy onlangs deur die Kings XI Punjab opgeraap is ná ’n uithalerseisoen vir die Oos-Kapenaars.

Sy vermoë om die een streepbal ná die ander in die laaste boulbeurte af te stuur, maak van hom die ideale doepa vir Van Zyl se doodsnik-boulwerk-kopsorge.

- Rapport