Sunette is spies-adel
2010-09-18 21:55
Die dag toe sy vir Barbora Spotáková op dié Tsjeggiese wêreldrekordhouer en Olimpiese kampioen se tuisbaan in Praag geklop het, het Sunette Viljoen haarself uiteindelik ná vele terugslae, teleurstellings én ’n sporadiese hoogtepunt hier en daar op vroue-spiesgooi se wêreldverhoog aangekondig.
Dít was op 14 Junie. Sunette se wen-afstand voor ’n fanatiese pro-Spotáková-skare was ’n nuwe Afrika-rekord van 66.38 – tot vandag toe 2010 se sewende beste gooi ter wêreld én nommer 15 op die wêreldlys van alle tye.
Agterna, vertel Sunette aan Rapport, het “Spottie” na haar toe gestap en gesê: “Sunette, vandag het jy my én vroue-spiesgooi se respek gekry.”
Dié was een van twee keer dat Suid-Afrika se Statebondskampioen vanjaar met die grote Spotáková (haar wêreldrekord is 72.28) afgereken het. Sunette het óók vanjaar met die Duitse supersterre Christina Obergföll en Linda Stahl én Amerika se nommer 1, Kara Patterson afgereken.
Sy het nou anderdag in Split, Kroasië, op die eerste Interkontinentale Beker-byeenkoms ’n silwermedalje vir Afrika gewen. Haar temmer dáái dag was die Rus Maria Abakumova, vanjaar se nommer?1 op die wêreldlys (68.89).
“Ja,” vertel dié 25-jarige boorling van Rustenburg en lid van die NWU-Pukke se atletiekklub, “die Rus hét my in Split met amper 6?meter geklop, maar vir my was die silwermedalje steeds iets besonders. Want my een vastraptoon moes kort vóór Split doodgespuit word, nadat ek hom ’n paar weke voor Split in Zürich met my eerste gooi in twee geskeur het.
“Daai dag in Zürich, op die Diamantliga-eindstryd, was die enigste keer vanjaar dat ek nie verder as 60?meter kon gooi nie (haar afstand in die sewende plek was 59.97). Ek het ná Zürich sewe steke ontvang en die toon was in Split nog alles behalwe gesond.” (Sunette se Split-afstand was 62.21).
Sy sê dáái toon is nou weer 100% – en sy oefen deesdae dat dit klap om volgende maand in Nieu-Delhi, Indië, haar Statebondstitel met welslae te gaan probeer verdedig.
Sunette is, saam met waarskynlik net die wispelturige Caster Semenya (800) en hamergooi-koning Chris Harmse, Suid-Afrikaanse atletiek se grootste gouemedalje-kandidate, veral noudat daar ’n vraagteken hang oor die fiksheid van ander sterre soos Mbulaeni Mulaudzi (800) en Khotso Mokoena (verspring).
Sunette is met daai Afrika-rekord vanjaar se nommer 1 in die Statebond. Naaste aan haar 66.38 is die Brit Goldie Sayers (vanjaar 63.15) en die Australiër Kimberley Mickle (61.36).
Oor haar vooruitsigte in Nieu-Delhi: “Ek glo rêrig 2010 het my soos nog nooit tevore nie gepantser om rêrig saam met vroue-spiesgooi se grotes te gesels. Ek het ’n lang seisoen gehad en, vet weet, ek het internasionaal die beste van my lewe presteer. Ek is ’n bietjie moeg, maar ’n grote én goud vir oulaas in Indië sal die kersie op die koek vir my wees.
“Ek onderskat niemand in die Statebond nie. Maar ná alles wat vanjaar met my loopbaan gebeur het, weet ek nou, meer as ooit tevore, dat as ek die dag daai spies raak slaan, gaan iets groots gebeur. Dit lê in hierdie gooi-armpie van my.”
En dan – ná Nieu-Delhi?
“Volgende jaar is die grote die wêreldkampioenskappe in Daegu, Suid-Korea. En dan natuurlik die héél grote: die Olimpiese Spele in 2012 in Londen.”
Sunette se vorige Spele, die een in 2008 in Beijing, het vir haar binne ’n paar weke van nagmerrie tot sprokie tot wéér nagmerrie geëindig, toe sy eers ná die SA span se vertrek na Beijing in die span opgeneem is nadat die nou-vergane “ou” Atletiek Suid-Afrika (ASA) haar aanvanklik nie wou kies nie.
Sy het toe in China nie die eindronde bereik nie, maar soos sy nou sê: “Dis verby. Vandag reik ek na die wolke. En my teenstanders weet vandag hulle moet in hul pasoppens wees vir hierdie klein fightertjie.”