Die Vodacombeker-reeks begin eers die naweek,
maar het reeds môre ’n invloed in die samestelling van die spanne vir die vierde
ronde van ENB se Varsitybeker-kompetisie.
Die Maties, wat tot dusver met hul teenstanders mors, is gelukkig
dat hul Westelike Provinsie-spelers nog môre vir die studente kan speel voordat
hulle die naweek die Streeptrui aantrek.
UJ, wat verlede week sleg deur die Maties afgeransel is, was nie so
gelukkig nie.
Die Goudstad-studente se selfvertroue is nie net deur Maties aan
repe geskeur nie, maar hulle moes ook toesien hoe die Jong Leeus nog vleis van
die bene kom afkou vir hul Vodacombeker-verpligtinge.
Drie spelers uit die agttal – Justin Wheeler, David Bullbring en
Wayne Swart – is Coca-Colapark toe en moes vervang word.
Al drie was tot dusver flink en daar sal veral heelwat druk wees op
Wiehan Roos, wat Wheeler moet vervang.
Roos-hulle spring in ’n bus om die Pukke op die Fanie te gaan pak
en die terugrit kan ’n lang, stil een wees.
Afrigter Hugo van As het Ryno Luus op losskakel gekies in die plek
van André Smit in ’n poging om meer gestruktureerd te wees, maar of sy
betroubare voet die deurslag sal gee, is te betwyfel.
Die Pukke het Willem Barnard op senter gekies ná hy van ’n besering
herstel het en die Noord-Kapenaar kan die besoekers laat bontstaan.
Dirco Rautenbach lei tans van voor vir die Pukke en as hy sy pak
aan die brand hou, gaan Barnard-hulle agterlangs baljaar.
Die terugkeer van die SA o.20-span ná sy toer uit Frankryk was
manna uit die hemel vir ander spanne.
Die Shimlas kon die giftige Jamba Ulengo op vleuel insluit en
Marcel van der Walt as plaasvervanger kies vir hul stryd teen die Maties.
Die Shimlas-stoomtrein loop mooi ondanks verlede week se
naelskraapse nederlaag teen die Pukke, maar Wayne Stevens sal dit duidelik in sy
spanmaats se koppe moet inprent dat ’n nederlaag teen die Maties hulle
beker-kanse lelik gaan knou.
Die Maties kan nog vir oulaas steun op die bydraes van Conrad
Hoffmann, Jurgen Visser, Lourens Adriaanse en Hugo Kloppers voordat hulle
Vodacombeker toe gaan en lyk te afgerond vir die tuisspan.
Die Maties is wel sonder Dabeon Draghoender wat beseer is, maar sy
plaasvervanger, Stephan van der Merwe, is self ’n lynbreker van formaat.
Ikeys, wat self op die meeste van sy silinders loop, verloor ook
vir Yaya Hartzenberg, Martin Muller en Tim Whitehead ná hul stryd teen
TUT.
Die besoekers sal ’n wonderwerk nodig hê om die Tigers op sy eie
veld te klop. TUT se dissipline was verlede week bitter swak. Die span bly op
papier ’n gedugte een, maar iets skort in die poging op die veld.
Verwag van die Ikeys om sy plek onder die laaste vier te
verseker.
Tukkies ontvang NMMU se Madibaz en sal die druk verlig met nóg ’n
oorwinning.
Die tuisspan is maar sesde op die punteleer en loop gevaar om die
halfeindstryde te mis.
Beserings het weer sy tol geëis, maar die terugkeer van Peet
Vorster as vaskop sal baie help. Sampie Mastriet is ook as plaasvervanger
nadergetrek en dié Jong Bokkie kan die Baaienaars huistoe laat verlang as hy op
die veld kom.
Volgens die Madibaz se kaptein, Luso Booi, het die drie nederlae
(almal met vyftigtalle teen hulle) nie sy span se gees geblus nie.
“Ons skrums en losspel is goed, maar direkte lakwerk en ongedwonge
foute het ons tot nou toe gekos. Ek is egter tevrede dat die harde werk in die
verband ons sal help om die Tukkies te gaan verras. Ons bly positief oor ons
kanse,” het hy gesê.