Die Lions het vandag nog die bewerasies van hul
Sydney-nagmerrie wat hom Vrydag afgespeel het.
Tog gaan hulle tot Donderdag in dié Australiese stad aanbly voordat
hulle na Nieu-Seeland reis om nog ’n nagmerrie af te weer wanneer hulle Saterdag
teen die Crusaders speel.
Die Waratahs het die Lions Vrydag met 73-12 afgeransel en het in
die proses 11 drieë gedruk. Dit was die Waratahs se meeste drieë én punte nog in
’n Super-rugbywedstryd en hulle het die Lions soos ware liggewigte laat
lyk.
Dick Muir, Lions-afrigter, het nie doekies omgedraai oor die swak
vertoning nie en sê hy het ’n reuse-taak om sy troepe hierdie week van die vloer
af te lig.
“Dit was ’n harde en frustrerende aand gewees. Veral omdat ons
sulke goeie voorbereiding vooraf gehad het. Dus, as dinge só afloop, moet ons
vra waar dit fout gegaan het,” het Muir gesê.
Muir lig sy span se benarde verdediging as ’n groot rede vir die
nederlaag uit.
“Ons was toegewyd in die wedstryd, maar ons het ons lakwerk
agterweë gelaat. ’n Mens moet krediet gee aan wie dit toekom.
“Hulle het geweldig goed verdedig. Ons het hulle hard laat werk vir
hul drieë, maar hulle is ’n gehalte-span.”
Die afrigter was ook teleurgesteld in sy span se onvermoë om as ’n
troosprys ’n bonuspunt vir vier drieë te behaal.
“Elke slag as die balbesit omgekeer is, het hulle gaan druk –?ja,
dit was nie goed nie.”
Verskeie spelers het benede Super14-standaard gelyk en dit sluit
die ervare All Black-losskakel, Carlos Spencer, in. Spencer het juis Vrydag in
sy 100ste Super-rugbywedstryd gespeel.
Ander spelers soos Earl Rose en Wandile Mjekevu het ook swak
wedstryde gehad en Muir sal hierdie week mooi moet besin oor hul voortgesette
betrokkenheid op hierdie toer.
“Ons gaan ’n paar moeilike besluite moet neem. Party spelers het
hulself glad nie regverdig nie.”
Die Lions se vaste fasette het ook glad nie oortuig nie en dit is
moeilik om te sien hoe hulle al die probleemareas betyds kan uitstryk om hul
toer met oorwinnings teen die Crusaders en die Highlanders af te sluit.
“Ons ken die aard van hierdie reeks. Ons moet bloot seker maak dat
ons die ouens weer van die grond af optel. Ons het ’n paar idees, maar dit is
nóú die tyd wat die spelers se karakter sal moet deurskemer.”
Die Waratahs het die Lions se verdediging reeds in die sesde minuut
oopgevlek toe die vleuel Drew Mitchell gaan druk het.
Dié Wallaby het uiteindelik vier keer gaan druk en sy span was teen
rustyd reeds met 33-5 voor.
Een van Josh Holmes (plaasvervanger-skrumskakel) se twee drieë moes
nie toegelaat gewees het nie, want die assistent-skeidsregter, James Leckie, het
nie raakgesien hoe Lachie Turner (Waratahs-vleuel) vroeër in die beweging
ooglopend op die kantlyn trap nie.
Die beslissing het wel geen invloed op die uitslag gehad nie, maar
dit was, soos die Lions se vertoning, nie iets wat op Super14-vlak hoort
nie.