50-3: Streeptruie hol verslae Griekwas disnis
2010-08-07 21:33
Stephen Nell in Kimberley
Die boodskap aan die Westelike Provinsie op die Diamantstad se lamppale was duidelik: Julle sal moet bloei om te wen.
Nee wat. Die Kapenaars moes gister hier vlugtig in die eerste helfte ’n bietjie sweet toe Duane Vermeulen in die koelkas was, maar het uiteindelik verspot maklik met 50-3 met Griekwas in hul Curriebeker-wedstryd op GWK-park afgereken.
Let wel: dis dieselfde veld waar die WP in die voorafgaande twee seisoene verloor het en waar die Haaie en Leeus al vanjaar ’n mistoebroodjie geëet het.
Hierdie was veronderstel om die Kapenaars se moeilikste uitdaging tot dusver te wees, maar hulle was aboluut meedoënloos en Griekwas gaan die nuwe week met bomskok begin.
Die WP se resep was aanvanklik dieselfde as in die voorafgaande vier seges – kragspel voor, rotsvaste verdediging en Willem de Waal se uiters betroubare skopvoet.
Hulle het egter in die tweede helfte flair by dié formule gevoeg – en die uiteinde was 40 van die mees indrukwekkende minute wat ’n mens seker vanjaar in Curriebeker-rugby sal sien.
Die drie wat Deon Fourie afgerond het, het herinner aan daardie merkwaardige een van Bryan Habana vir die Stormers teen die Chiefs in Hamilton vroeër vanjaar. Die oorsprong daarvan was in omkeerbesit wat byna op die WP se doellyn gewen is en die besoekers het puik bal- en kontakvaardighede in die aanloop ten toon gestel.
Ses drieë in die tweede helfte vertel die storie. Die Springbok-senter Juan de Jongh, wat as Speler van die Wedstryd aangewys is, het die fees ná agt minute se spel in die tweede helfte begin.
Twintig minute later het Gio Aplon in die ander hoekie afgerond vir die bonuspunt. ’n Mens kon amper nie glo dat die WP dit só maklik kon laat lyk nie.
Die Kapenaars het egter die grondslag reeds in die eerste helfte gelê. Hulle het hul kanse baie beter as Griekwas benut en Willem de Waal het in sy 100ste Curriebeker-wedstryd die telbord heerlik laat saamgesels.
Griekwas het baie lynstaanbesit afgestaan en het ook nie agterlangs ’n plan gehad om die WP se verdediging te klop nie.
Naas Olivier het die tuisspan vlugtig gelyk laat trek toe Vermeulen vir sy hoogvat op Richard Lawson gestraf en koelkas toe gestuur is, maar Griekwas kon niks meer as gebiedsvoordeel buit nie.
Hulle het later in die eerste helfte self vir Bjorn Basson vir 10 minute vir ’n gevaarlike doodvat op De Waal verloor.
Riaan Viljoen was ook nie soos in die seges van 2008 en 2009 oor die WP ’n faktor nie. Hy het vier skepskoppe verbrou en ’n paar belowende aanvalle het ook gesneuwel toe hy grondskoppies teen teenstanders vasgeskop het.
Dis nietemin ’n pluimpie vir die WP dat spanne die stewel moet inlê in wanhopige pogings om sy verdediging te klop.
Aplon het met sy klein lyfie twee van die grootste doodvatte in die eerste helfte uitgevoer. Peter de Villiers hoef sekerlik nie verder te kyk vir die Bokke se nr. 14-trui nie.
Dieselfde geld die nr. 13-trui terwyl Jaque Fourie sy skorsing uitdien, want De Jongh is defnitief pure Springbok.
* Punte: WP 50 (12): Drieë: Juan de Jongh, Deon Fourie, Conrad Jantjes, Gio Aplon, Pieter Louw, Lionel Cronjé. Doelskoppe: Willem de Waal (3), Cronjé. Strafdoele: De Waal (4).
Griekwas 3 (3): Strafdoel: Naas Olivier.