Agterspelers loop meer in Super14 as voorspelers

jharmse@sport24.co.za

Fiksheid wen wedstryde.

Dié stelling is so oud soos die berge, maar onlangse navorsing toon dat spelers deesdae verder hardloop in die tweede helfte van wedstryde as in die eerste en boonop in meer botsings betrokke is.

Volgens navorsing deur dr. Ross Tucker, sportwetenskaplike van Kaapstad wat betrokke is by onder meer die nasionale sewesrugbyspan, kom 65% van alle impak in die tweede helfte van wedstryde voor.

Hy omskryf impak as ’n speler se betrokkenheid by ’n duikslag of ’n botsing op die grond en meen voorspelers word aan meer eise as agterspelers blootgestel.

“Agterspelers hardloop wel tussen sewe tot sewe en ’n half kilometer in ’n wedstryd en voorspelers tussen vyf tot sewe, maar agterspelers loop veel meer in ’n wedstryd,” het ­Tucker bevind.

Agterspelers loop/staan 75% van ’n wedstryd en voorspelers 65%.

Agterspelers is by sowat 150 botsings in ’n wedstryd betrokke, maar voorspelers tot soveel as 300.

Losvoorspelers hardloop die meeste in ’n wedstryd.

’n Losvoorspeler verbrand 8 400 kilojoules in ’n ’n wedstryd teenoor ’n agterspeler se 7 140 kilojoules.

’n Marathon-atleet wat 90 kg weeg, verbrand dieselfde hoeveelheid energie oor 21 km (halfmarathon) as ’n speler in ’n Super14-wedstryd.

Die grootse energietapper is die verandering in spoed gedurende wedstryde.

Volgens Tucker kan spelers dit tot 750 keer in ’n wedstryd doen met minstens 30 “naellope” van sowat 20?meter wat plaasvind.

- Rapport