Blitse betrek spog-akademie
2012-01-07 23:10
Die Springbok-sewesspan het vandeesweek hul nuwe tuiste hier by die Stellenbosse Sportakademie (SAS) in gebruik geneem – en is dit nou ’n grênd spulletjie.
Die SAS is langs en op die Paul Roos Gimnasium se Markötter-sporterrein gebou en sal voortaan die permanent tuiste en oefengeriewe van die Blitsbokke en die WP Rugbyinstituut (WPRI) wees.
Volgens Rob Benadie, uitvoerende hoof van SAS, het die plaaslike sakereuse Johann Rupert ’n nut vir ’n stukkie grond aan die oewer van die Eersterivier gesoek: “Die grond behoort aan die maatskappy Remgro (waarvan Rupert die voorsitter is) en Rupert het nog altyd graag in sport belê.
“Daar is dus besluit om ’n sportakademie van wêreldgehalte hier op te rig – met die plan om die Blitsbokke en WP Instituut as langtermyn huurders te betrek,” het Benadie aan Rapport gesê.
Die geriewe bestaan onder meer uit twee gimnasiums, ’n mediese - en fisioterapie-praktyk, kantore, ontspanningsvertrekke, 64 dubbelslaapkamers, ’n restaurant, swembad en ’n onderdak-oefenveld met sintetiese gras.
Die Blitsbok-breier, Paul Treu, meen hierdie geriewe maak dit vir hom en sy span makliker om ongestoord vir die Wêreld-sewesreeks en Olimpiese Spele van 2016 voor te berei.
“Dis vier jaar voordat sewes sy buiging op die Olimpiese Spele maak. Hier is nou ’n omgewing waar ons gefokus kan voorberei, met ál die geriewe by mekaar,” het Treu gesê.
Die Bokke huur 10 kamers, met spelers soos Cecil Afrika en Bernardo Botha wat permanent daar tuisgaan. Die WPRI huur 26 kamers en sy groep vir 2012 het Vrydag ingetrek.
Die behuisingsafdeling van die geriewe word deur die hotelgroep Southern Sun bestuur. Die kamers het elk sy eie klein kombuis, ’n ruim badkamer en groot slaapkamer.
’n Dieetkundige is permanent in diens geneem.
Die indrukwekkendste deel van SAS is sekerlik die onderdak-oefenveld, wat op die Markötter-terrein gebou is.
Die Bokke se fisioterapeut, Hugh Everson, het aan Rapport gesê die span het in die verlede verskeie oefensessies weens gure weer gemis en dat dié veld sake aansienlik makliker kan maak.
SAS bedien egter nie net rugbyspelers nie. Onder meer die Duitse swemspan berei tans daar voor vir die Olimpiese Spele.
“Suid-Afrika was die eerste land om ’n sentraal gekontrakteerde sewesgroep te hê. Baie lande het ons dit nagedoen. Met SAS is die Bokke hul teenstanders nou weer ’n paar stappe voor.
“Ek wil glo hulle sal ons weer naboots en só bevorder ons sport wêreldwyd,” het Benadie gesê.
Die amptelike opening vind Woensdag plaas, wanneer die Maties teen die Engelse superklub Saracens te staan gaan kom.