Brüssow vuur en vlam en wil net speel

Die “swak” plekke in Heinrich Brüssow se Springbok-lyf is weer sterk – en hy hoop om vanjaar heelwat meer op die rugbyveld te wees om balle te steel.

Volgens dié 25-jarige Cheetahs-flank is dit nodig om weekliks te speel sodat jy ’n goeie spelpeil kan handhaaf.

Hoewel hy verlede jaar herhaaldelik weens klein beserings uit was, het hy dit reggekry om onder meer in die Drienasies-reeks teen die All Blacks te wys waarom hy as ’n internasionale grypdief bekend staan.

Volgens Brüssow het die Cheetahs se nuwe, ingevoerde kondisioneringsmetodes “wondere” verrig.

“Ek wil beslis vanjaar meer speel. Dis lekker om weer reg te wees.

“Niel (du Plessis, die Cheetahs se fiksheidsafrigter) en PVM het baie moeite gedoen met nuwe tegnologie en metodes wat hulle in Amerika gekry het. En dis werklik uiters doeltreffend.

“Ek hoef nie meer net rehab vir my been te doen nie, want al die nuwe oefeninge – balansering, oefeninge in die swembad en met ’n ballistic ball – maak jou bene vanself sterker.

“Ek voel goed en al die ouens wat klein beserings gehad het, lyk goed,” sê hy.

Dié voormalige Grey-leerling het dalk nie verlede jaar ’n ernstige besering opgedoen nie, maar hy was steeds baie uit aksie.

Hy het sy knie se kruisliga­mente in 2010 se die Super-reeks geskeur.

In 2011 het sy knie hom die Cheetahs se eerste drie Super-wedstryde laat misloop, waarna hy ook ’n rib en dyspier in dié reeks beseer het.

Sy laaste besering was ’n rib in die Wêreldbeker, wat hom ook die einde van die Curriebeker-reeks laat misloop het.

Weens die afgelope twee seisoene se beserings, kon hy net in sowat ’n derde (10 uit 29) van sy streekspan se Super-kragmetings speel.

“Sulke klomp klein beserings soos verlede jaar is ook frustrerend. Op dié vlak soek jy bestendigheid. Jy moet wedstryd ná wedstryd speel om werklik op dreef te kom.

“Dis moeilik as jy vier wedstryde speel, ’n besering opdoen en dan weer net vier speel. Ons het goed gekondisioneer.

“Ek het die hele voorseisoen saam met Niel gewerk om al my swak plekke weer sterk te kry.”

Du Plessis en Alfred Rheeder, besturende direkteur van PVM Nutritional Sciences en borg van die Cheetahs, het einde 2011 by Gavin MacMillan, ’n kondisioneringsghoeroe in Amerika, gaan kers opsteek.

Die grootste verandering in die Cheetahs se voorbereiding is om die spelers nou beter rugby-atlete, en nie noodwendig net groter en sterker nie, te maak.

Hulle hoop ook om beserings sodoende te verminder.