Bulle gaffel pad oop
2012-10-13 22:52
Vanaf absoluut nêrens nie kan die Blou Bulle nog vanjaar die Curriebeker-kampioen word.
Hulle het dit gisteraand hier in die huis van die kampioen gewys deur drie keer die voorsprong terug te gryp en uiteindelik oortuigend met 50-29 teen die Goue Leeus te wen.
En dit was so Blou Bul as wat jy kry:
* Hangskop-taktiek van Morné Steyn en Zane Kirchner, maar vir ’n slag weer dodelik akkuraat;
* Rowwe rolmaalbewegings wat tot punte lei; en
* Die telbord wat rol danksy Steyn se herfokusde lens.
Al vyf die Bulle se driedrukkers was al in Springbok-oefengroepe. Dus, ja, dié Bok-toevoegings het sommer baie gehelp.
Teen rustyd het die Bulle reeds gedoen wat hulle die afgelope weke op die Curriebeker-reeks se puntelys moes doen – ’n agterstand uitgewis.
Die agterstand was ’n volle tien punte nadat Michael Rhodes se drie van teenaan die kantlyn deur Butch James verdoel is. 16-6.
Dit was ’n spoggerige drie, waarin die haker Callie Visagie twee keer gehanteer het.
Daar was dalk nog meer vonk in Bjorn Basson se drie agt minute voor rustyd waarvoor die Bul Jacques Potgieter galoppend deur die middelveld gestorm het.
En tussendeur was daar skoppe. Verskeie hoeke en afstande het vir Steyn en James getoets.
Steyn, wat uiteindelik 23 punte behaal het, het selfs ’n parmantige skepdoel oorgeklits en ’n groot aandeel in die rustydvoorsprong van 22-16 gehad.
Vermoedens dat ’n nederlaag vir die Leeus nou maar wors was, is vir eers weggewuif toe hulle hul Springbok-losskakel in watte, Elton Jantjies, dadelik na rustyd opgestuur het.
Die Leeus het genoeg vuur gehad om by twee geleenthede daarna die telling gelyk te maak. Maar hul rûe is gebreek toe ’n derde TV-skeidsregter-beslissing in soveel minute om ’n moontlike Bul-drie te ondersoek uiteindelik in die Bulle se guns beslis is.
Arno Botha se rolmaaldrie was die oomblik waarna die verswakte Leeus-span verswak begin lyk het.
Die kaartjiepryse vir die Leeus se halfeindstryd op hul tuisveld volgende week is gister al uitgereik, en in die laaste 20 minute het dit gelyk of hul gedagtes reeds daar lê.
En dié Bul-span storm duidelik vir ’n wit vlag net so verwoed soos vir ’n rooie.
Hy is in die laaste kwart met hoewe omhoog bo-oor die Leeus en nog twee drieë later was die telling nie net 50 nie, maar die Bulle se selfvertroue min of meer waar dit moet wees voor ’n Curriebeker-halfeindstryd in Durban.