Derby-dag!
2013-02-24 07:32
Tot Maties self sal ruiterlik erken dat hulle stomverbaas is om ná drie rondes in die Varsitybeker-reeks onoorwonne én heel bo aan die puntelys te wees.
Teen UJ het die Stellenbosse studente immers eers in die tweede helfte ’n rat gehaak.
Teen Shimlas het hulle ondanks bittermin besit en danksy Houdini se ontsnapkuns gewen.
En die afgelope Maandag was dit so hittete of die Madibaz het in die Danie Craven-stadion hul eerste opskudding van die jaar veroorsaak.
Die Stellenbossers is al swaar geweeg en nog nie te lig bevind nie, maar ’n groter beproewing gaan hulle nie sommer kry as môre-aand se wedstryd in die LC de Villiers-stadion teen Tukkies nie.
Die verdedigende kampioen het ná sy aanvangsblaps in Potchefstroom so geleidelik beginne lyf wys.
En as daardie tendens hom môre in dié Noord-Suid-derbystryd voortsit, kry die Maroen Masjien met een te doen wat (minstens op papier) nie sy gelyke het in vanjaar se kompetisie nie.
Albei spanne het besonderse agterspelers, maar die meeste van hul rugby word voorlangs gespeel. Hulle dryf graag met die bal en dít is hoe Tuks die oormaat van sy drieë druk.
Dié spanne behoort mekaar wel in vaste spel na weerskante toe besig te hou, maar die bepalende faktor behoort eindelik balbesit te wees.
Dít kan vir een span ’n paar puntekanse en gevolglik die wedstryd besorg.
In dié opsig behoort veral een tweestryd interessant te wees – dié tussen Shaun Adendorff (oopkant-flank van Tuks) en Helmut Lehmann (nommer ?6 en die kaptein van Maties).
Dié twee is klassieke grondspelers met wesenlike ervaring. Lehman het verlede jaar vir die Streeptruie Curriebeker-rugby gespeel en Adendorff was een van drie benoemdes vir die Internasionale Rugbyraad (IRR) se junior Speler van die Jaar.