Ek was dalk verkeerd om met Morné te volhard, sê Heyneke

Die Springbok-afrigter, Heyneke Meyer, erken hy het “moontlik gefouteer” deur Morné Steyn nie gister ná rustyd met Johan Goosen te vervang nie.

Die Bok-kaptein, Jean de Villiers, glo weer die ander soort rugbybal wat stelskoppers hier in Nieu-Seeland gebruik, kon dalk ’n rol in Steyn se swak stelskop-vertoning gespeel het.

Verbroude stelskoppe het in ’n groot mate bygedra tot die Bokke se nederlaag. Tussen die twee Steyns (Morné en Frans) en Johan Goosen het die Bokke sewe keer misgekorrel.

Die span se onvermoë om die talle geleenthede tot hul beskikking te laat tel, asook Dean Greyling se geel kaart, het egter agterna die swaarste geweeg onder die Bok-afrigter se redes waarom sy span die vierde keer in vyf wedstryde nie kon wen nie.

“Jy haal nie net ’n ou af oor sy stelskoppe nie,” het Meyer gesê oor sy besluit om Steyn tot in die 58ste minuut op die veld te hou. “Ons het rustyd daaroor gepraat, maar ek het gedink Morné sou sy ritme terugkry.

“Met die voordeel van die terugblik is dit maklik om sulke besluite te neem, maar in daardie oomblik was dit vir my soos ’n besluit om lewe en dood. Miskien het ek die verkeerde besluit geneem, maar Morné slaan gewoonlik terug en skop weer goed.”

Volgens De Villiers is daar rustyd besluit om Steyn nog één skopkans te gee: “Hy het een gekry toe ons ’n drie gedruk het (en weer gemis). En toe haal ons hom af.

“Jy moet vertroue in jou spelers hê, maar soms ook moeilike besluite neem. Maar ons moenie vergeet nie dat ons hier met die Adidas-bal gespeel het, terwyl ons met die Gilbert-bal in Super-rugby en in Suid-Afrika speel. Dis ’n ander soort bal en ons het gesien hoe die stelskoppers (verlede jaar) in die Wêreldbeker daarmee gesukkel het.

“Ongelukkig het hy nie al sy skoppe oorgeskop nie, maar dit maak nie van hom ’n swak speler nie.”

Meyer het ook sy besluit verdedig om Tendai Mtawarira ná 51 minute met Dean Greyling te vervang.

“Beast het nog elke wedstryd dié jaar gespeel en was moeg. Ek het gedink vars bene sal op daardie tydstip help, want die tempo was hoog.”

Die teleurstelling was gisteraand groot in die Bok-kamp ná die span die derde keer agtereenvolgens ’n oorwinning weggesmyt het.

“Ek is teleurgesteld. Ons spelpatroon was reg en ons het hulle onder druk geplaas, maar jy moet dít in punte omskep – en dít was die verskil tussen die twee spanne. Hulle het hul kanse benut, maar ons kon nie.

“Ons het verloor en dit is nie goed genoeg nie,” het Meyer gesê.