Groot taak wag vir jong Gary
2012-01-14 23:42
’n Rugbyskrywer weet hy raak oud wanneer ’n losskakel hom “Oom” begin noem.
Dis egter op ’n jong Stormer se skouers waarop baie verantwoordelikheid in die vroeë stadiums van vanjaar se Super-reeks kan rus.
Gary van Aswegen het nog net sewe eersterangse wedstryde gespeel, maar dit sou aansienlik meer gewees het as ’n mediale knieligament in sy regterknie nie verlede jaar twee keer geskeur het nie.
Eers was dit mors-af in in Superrugby en daarna ’n gedeeltelike skeur in die Curriebeker-reeks.
“Ja, die beserings was baie frustrerend. Die situasie was aanvanklik nog draaglik, maar mettertyd het dit ál hoe moeiliker geraak,” vertel dié 21-jarige vandeesweek by die Stormers se oefenkamp in Hermanus.
“Ek het maar vasgebyt en is nou 100%. Ek is só honger vir speel.”
Of hy daardie geleentheid kan kry, kan van vertonings in die Stormers se voorseisoense wedstryde afhang.
Die mededinging is kwaai, want die Kapenaars se breier, Allister Coetzee, het vier losskakels in sy aanvanklike groep gekies.
Burton Francis is waarskynlik die man wat vir eers Van Aswegen se kwaaiste mededinger vir die nr.10-trui gaan wees.
Die Stormers se gereelde losskakel, Peter Grant, word deur die loop van Maart terug uit Japan verwag. Demetri Catrakilis en Kurt Coleman is óók in die aanvanklike groep.
Met die beseerde Bolander Elgar Watts bygereken, het Coetzee ses losskakel-opsies.
Grant se terugkeer sal verwelkom word, maar intussen kan daar ’n gulde geleentheid vir iemand anders wees.
Gemeet aan die belofte wat hy in die vorige twee seisoene in die WP getoon het, is Van Aswegen ’n sterk aanspraakmaker.
“Ja Oom, dis seker my belangrikste seisoen tot nóg toe. Ek is nou al drie jaar in die WP. Ek wil in die mix kom en daar bly. Dis nou ’n kwessie van speelkans kry en hoe ek vertoon.”
’n Stukkie interessante statistiek omtrent Van Aswegen is dat hy tot op hede 100% van al sy skoppe vir die Stormers deur die pale gejaag het. Daar was egter nog net 4 skoppe!
Hieroor lag hy en hoop hy dinge kan met genoeg speelkans vorentoe verander.
“Ja, dis nog 100%, maar hopelik speel ek genoeg dat dit mettertyd daal!”
Voorspoed, ou seun.