Kiwi-konneksie slyp Taute vir groter dinge
2012-01-21 22:56
- Artikelopsies
- Deel
- Kry Rapport op
Daar is nog twee maande om te wag voordat die Lions-heelagter Jaco Taute mondig word, maar dié Curriebeker-held berei hom reeds vir sy vierde seisoen op senior vlak voor.
Steeds bloedjonk ja, maar sedert hy in 2009 as hoërskoolseun sy buiging vir die Goue Leeus gemaak het, het hy tree vir tree gevorder tot ’n heelagter wat vir niks en niemand terugstaan nie.
Dít op 20.
Daar is nie eens twyfel dat hy die mees opwindende agterspeler in 2011 se Curriebeker-reeks was nie. Maar wat nóg belangriker is, is die groei wat hy veral met besluitneming getoon het.
Uit die staanspoor was Taute lief vir teenaanvalle liewer as om die bal uit radeloosheid die lug in te jaag – en dít opsigself was verfrissend in ’n Suid-Afrikaanse rugbykonteks.
Tog het hy die teenaanvalle mettertyd ál beter beplan en die risiko verminder, sonder om sy x-faktor op die vullishoop te gooi.
Wanneer jou afrigter – ’n streng voormalige All-Black-afrigter – jou op 20 al ’n “ware professionele speler” noem, doen jy iets reg.
En John Mitchell verwag dat Taute vanjaar steeds gaan verbeter en hy sê ons gaan ’n nóg fisieker Taute sien wanneer die seisoen begin.
“’n Speler is nooit die voltooide produk nie. Maar die wonderlike ding van Jaco is sy selfbewustheid op en van die veld af.
“Hy groei deurgaans as ’n beroepspeler – en groei fisiek óók!”
Mitchell beskou verlede jaar se Super-reeks, waarin Taute nog wisselvallig was, maar reeds tekens van sy ongelooflike potensiaal gewys het, as ’n noodsaaklike bestanddeel in die resep om die speler te ontwikkel.
“Daardie ervaring was vir hom nodig om te kom tot waar hy nou is,” sê sy breier.
Soos in die geval van die Lions-losskakel Elton Jantjies, kan die hand van nóg ’n oud All Black, die Lions-hulpafrigter Carlos Spencer, ook in Taute gesien word.
Sowel Jantjies as Taute is bereid om op die veld te waag ten einde teenstanders se sterte te knoop, maar soos Spencer dit in sy speeldae vermag het, is dit berekende risiko’s ...
In die Curriebeker-eindstryd van verlede seisoen was daar boonop ’n oomblik waarin Taute nóg iets gewys het waarmee hy sy loop in 2012 kan laai.
Jantjies het met tye in die seisoen nie groot afstand met sy stelskoppe gekry nie – en in die eindstryd het Taute die bal gevat toe die Leeus ’n strafskop anderkant die halflyn kry.
Die gemak waarmee hy die lang skop deur die pale gejaag het, was Frans Steyn-agtig.
“Ons probeer die spelers vir alle scenario’s voorberei,” verduidelik Mitchell. “Soos met Jaco. Ons moedig hom vir seker aan om aan sy lang skoppe te werk.”
Die Lions het vroeër die afgelope week vir ’n paar dae ’n oefenkamp in Mafikeng bygewoon, waar die span se doelwitte en kultuur vir 2012 bespreek is.
Aanvals- en verdedigingsplanne is ook behandel.
“Maar ons is nog ver van waar ons wil wees,” sê Mitchell. “Ons werk steeds hard – en dit is nog maar die voorseisoen, al sou ons kon speel as ons môre moes.”
Die Lions se voorseisoense kragmeting in die Kaap met die Sharks is onlangs afgelas en vandeesweek is ’n kragmeting met die Cheetahs as die Sharks se plaasvervanger óók van die baan.
Dit laat komende Vrydag se wedstryd teen die Stormers op Nuweland as die Lions se vernaamste voorseisoense wedstryd uitstaan, hoewel hulle in Februarie ook teen die OP-Kings speel.