Leeu-brul in die Kaap
2012-09-29 23:26
Die Leeus is so te sê seker van ’n tuis-halfeindstryd, nadat hulle die WP gistermiddag hier met 22-9 getrap het.
In die geheel het die Johannesburgers hul kanse baie beter as die WP benut en verdienstelik as oorwinnaars van die veld gestap. Daarteen kan niemand stry nie.
Maar die WP sal ook lank na homself in die spieël moet kyk oor sy eie onvermoë om enige ligapunte te verdien in ’n wedstryd waarin hy in ’n stadium teen net veertien Leeus gespeel het.
Die Leeus-losskakel, Butch James, het in die tweede helfte vir tien minute in die koelkas gaan uitspan ná hy vir ’n hoogvat gestraf is. Die wedstryd was in daardie stadium op ’n naaldpunt gebalanseer, met die Leeus net met 9-6 voor, maar in James se afwesigheid kon die Kapenaars net drie punte aanteken – ewe veel as hul teenstanders.
Die WP het wel in daardie tien minute ’n geleentheid vir meer punte gehad, maar ná ’n strafskop voor die Leeus se pale besluit om eerder ’n tikskoppie te neem as om na die pale te korrel.
Dié voortvarende beweging het punteloos gesneuwel, met die WP wat met die bal oor die kantlyn geboender is.
James het sekondes daarna sy terugkeer tot die speelveld gemaak – en die Leeus het die sielkundige stryd gewen.
Die WP-slot De Kock Steenkamp het uiteindelik die sneller van die geweer teen sy span se kop getrek. Tot voor gister het dié werkesel hom nie aan enige tierlantyntjies gesteur nie, maar ’n aangee deur sy bene na een van sy spanmaats is deur die Leeus se regtervleuel, Deon Helberg, onderskep en in ’n vyfpunter omskep.
Dit was die laaste spyker in die Kapenaars se doodkis.
Die WP het in die tweede helfte eintlik veel meer kanse as die Leeus gehad om punte aan te teken, maar die Streeptruie se afronding was power, met die besoekers se verdediging boonop ondeurdringbaar.
Ander gebreke in die WP se spel was hul swak lynstaanspel en vrot taktiese skopwerk.
Die wedstryd is gekenmerk deur swak hanteerwerk deur albei spanne, maar die ligte reën het waarskynlik ’n rol daarin gespeel.
Vir die Leeus het James ’n groot rol in hul welverdiende oorwinning gespeel. Sy taktiese skopwerk was voortreflik, terwyl hy ook sy algemene spel slim afgewissel het. Die hoogvat waarvoor hy ’n geel kaart ontvang het, het nie so erg gelyk nie – en gelukkig vir hom uiteindelik geen rol in die uitslag van die wedstryd gespeel nie.