Lions gee beter poging
2010-03-06 19:34
pieter.jordaan@sport24.co.za
Die meeste Suid-Afrikaanse spanne het al veel vrotter teen die Brumbies in Canberra gevaar as wat die melkbaard Lions-span dit Vrydag gedoen het.
’n Kombinasie van ’n gebrek aan ervaring, moeilike weerstoestande en ’n paar betwisbare skeidsregterbeslissings deur die Nieu-Seelander Steve Walsh het die Lions uiteindelik winduit geslaan.
Die Brumbies het die wedstryd 24-13 gewen danksy ’n strafdrie in die eerste helfte en drieë na lemoentyd deur Christian Lealiifano (senter) en Stephen Moore (haker).
Maar al was selfs verdere vordering by die “nuwe” Lions te bespeur, is Dick Muir (afrigter), geensins tevrede met die uitslag nie.
“Ek moet sê ons is weer teleurgesteld, juis omdat ek voel ons het soveel vordering gemaak en ons het ’n wenkans gehad.
“Ek dink ons het bietjie slegte geluk as dit kom by die wedstryde en sommige skeidsregterbeslissings. Ons weet egter ook jy moet jou eie geluk maak,” sê Muir.
Onder die 18 strafskoppe wat Walsh aan die Lions uitgedeel het was verskeie teen die Lions-skrumwerkers gewees.
Kevin Buys (vaskopstut) het derhalwe ’n geel kaart in die eerste helfte gekry en ná die soveelste strafskop ná ’n skrum, is ’n strafdrie aan die Brumbies toegeken.
Al het die jong nuwe voorry wat Muir vir die wedstryd gekies het –?JC Janse van Rensburg, Charles Emslie en Buys –?aanvanklik baie swaar geleef, sê Muir dat die strafskoppe telkens gebeur het nog voordat die Lions kón skrum.
“Ons is heeltyd gestraf met die inslaan, iets waarmee ons sover goed was vanjaar. Ons het nog nie gesukkel in die skrums vanjaar nie. Maar nog voordat ons kon skrum, is ons elke keer gestraf.”
Die Brumbies se loskopstut, Ben Alexander, was die groot doring in Lions-vlees.
Later in die wedstryd het die Lions wel goeie druk op die Brumbies in die skrums geplaas. Teen dié tyd was Heinke van der Merwe (loskopstut) en Hannes Franklin (haker) as plaasvervangers op die veld.
Franklin het ook die Lions se enigste drie gedruk.
Die reënweer het die skouspel geheel en al uit die wedstryd geneem en albei spanne sou ’n droë oppervlak verkies het.
Muir sê die Lions moes kort voor die wedstryd weens die reën hul wedstrydplan verander.
“Maar ons uitvoering daarvan was nie goed nie. Ons skoppe was nie akkuraat nie en ook nie die manier waarop ons die skoppe opgevolg het nie.”
Maar die Lions se verdediging het nog ’n groot verbetering getoon. Daarmee saam was die lynstaanspel en spel by die afbreekpunte ’n riem onder die hart.
Daar was wel ander slegte nuus vir die Lions.
Die staatmaker-vleuel Dusty Noble sal vir ’n paar maande langs die kantlyn wees nadat hy ’n ernstige kniebesering opgedoen het.
Noble sal na Suid-Afrika terugkeer, maar die Lions hoop om die Kiwi-losskakel, Carlos Spencer, vir die komende naweek se kragmeting met die Waratahs te kan kies.
* Punte:
Brumbies 24 (10): Drieë: Strafdrie, Christian Lealiifano, Stephen Moore. Doelskoppe: Matt Giteau (3). Strafdoel: Giteau.
Lions 13 (3): Drie: Hannes Franklin. Doelskop: Burton Francis. Strafdoele: Francis (2).
- Rapport