Perfekte 10
2012-04-21 22:38
Ondanks al die raad wat Heyneke Meyer tussen nou en Junie gaan kry, sal Morné Steyn waarskynlik weer die Springbokke se nr.?10-trui dra.
Nietemin het daar ná Vrydag se wedstryd in Brisbane tussen die Stormers en Reds ’n interessante vraag opgeduik: Wat van Peter Grant op die Bokke se plaasvervangersbank?
Dié Stormers-losskakel het ’n afgeronde vertoning gelewer in die Kapenaars se sege van 23-13 oor die Reds – en sy deugde maak ook van hom ’n heel skaflike binnesenter.
Grant het al meer as ’n handvol goeie wedstryde in die middelveld vir die WP gespeel – en sy veelsydigheid behoort van hom ’n sterk Bok-kandidaat te maak.
Nog meer só, as daar na sy stelskop-rekord gekyk word. Sy 5 uit 5 teen die Reds het sy rekord van 100% vanjaar gehandhaaf.
Sy slaagsyfer verlede seisoen was 85%.
Hy het ook die regte temperament – en hy het dít dubbel en dwars bewys deur die wedstryde teen die Sharks en Bulls op Nuweland met strafdoele te beklink.
Grant het Vrydag voortreflik vertoon.
Hy het die gapings raakgesien en aangeval, telkens die verdedigers goed getrek en met die blitsige Gio Aplon en sy eie drie selfs ook ’n paar teenstanders geklop.
Mike Harris sal ook goeie getuienis kan lewer van hoe hard Grant kan lak.
Dié Reds-senter is disnis deur hom geduik toe Will Genia ’n belowende aanval steelkant-om van stapel gestuur het.
“Peter is ’n baie onderskatte speler,” sê die Stormers se duidelik tevrede afrigter, Allister Coetzee.
“Sy ervaring was duidelik in die leiding wat hy agterlangs as onder-kaptein gegee het. Sy perfekte skoprekord beteken baie en hy besef ook sy verantwoordelikheid om die bal oor die voordeellyn te neem.”
Die Stormers het die Reds eergister pimpel en pers geduik op pad na hul sege.
Steven Kitshoff, Eben Etzebeth, Siya Kolisi, Juan de Jongh, Bryan Habana en Aplon was almal wéér ramkatte, terwyl die skrumskakel Dewaldt Duvenage ook goed gespeel het.
Die Stormers se spelpatroon berus op die beginsel dat elke speler sy rol binne die struktuur verstaan – en Duvenage was Vrydag die battery in hul enjin.
Die span se strukture en dissipline is die rede waarom hulle steeds gemaklik kan wen sonder sterre soos Andries Bekker, Schalk Burger en Jean de Villiers.
Bekker sal waarskynlik Saterdag in Perth sy terugkeer teen die Western Force maak, wat die Stormers weer ’n krag in die lynstane sal maak.