Reg of weg
2010-03-06 19:33
jharmse@sport24.co.za
Dit gons behoorlik hier én in Stellenbosch. Waar die Danie Craven-stadion egter uitverkoop is vir môre se Varsitybeker-intervarsity tussen die Maties en Ikeys, loop die lippe hier in die Jakarandastad oor hoekom die Tukkies afgelope Maandag so erg deur die Maroentruie verniel is.
Daar word swaar gesluk aan dié nederlaag en ernstige vrae word op die Tukkies-kampus gevra oor hul span se boedel-oorgawe teen die geswore vyand uit die Suide.
Van geswore vyande gepraat, die stryd tussen Maties en Ikeys beloof om een van die beste wedstryde in vanjaar se kompetisie te wees.
Die tuisspan het tot nou toe al sy teenstanders verwoes, terwyl die Ikeys self onoorwonne is.
Maties is reeds verseker van ’n plek in die halfeindstryd en ’n oorwinning teen sy oudste teenstander behoort te verseker dat die verdedigende kampioene bo-aan die punteleer klaarmaak.
Danie Craven is die enigste stadion waar toegangsgeld gevra word, maar desondanks is alle kaartjies uitverkoop vir die kragmeting.
Dinge word duidelik reg gedoen daar op Stellenbosch en Belius Potgieter en sy span verdien ’n ligte kopknikkie, indien nie staande applous nie.
Die besoekers het weer sy lostrio verander, met Sam Peter en Michael Morris wat saam met JJ Gagiano sal moet probeer om die Maties se besit so karig en stadig as moontlik te maak.
Die Maroentruie het Danie Poolman senter toe geskuif en spog met ’n uiters indrukwekkende plaasvervangersbank. Dit is moeilik om te sien dat hulle kan vasval.
In Pretoria speel Tuks teen Shimlas en die wenner van dié wedstryd gaan sy kanse versterk om in die halfeind te speel, terwyl droë brood die verloorder se voorland is.
Tukkies wend hom weer eens tot ’n nuwe skakelpaar. Shaun Davids is heelagter toe geskuif, met Stanley Twiname en sy geleerde skopvoet wat op losskakel begin.
Die jong Etienne Greeff is as skrumskakel gekies, terwyl die blitsige Tom Seabela op vleuel losgelaat word.
Shimlas het sy span onveranderd gelaat. Jaco Colyn speel sy tweede wedstryd op losskakel met Gerrie Odendaal, wat ’n jaar of wat gelede nog sy rugby in Pretoria gespeel het, as skrumskakel.
Samespel kan hier deurslaggewend wees en hopelik ontplof die gedurige verandering van personeel nie in die Tuks-breier, Freddie Grobler, se gesig nie.
Die ander twee spanne wat saam met Tuks en Shimlas vir die oorblywende twee plekke in die halfeindstryd veg, die UJ en Pukke, het “makliker” wedstryde teen NMMU en die TUT onderskeidelik.
NMMU het Braam Gerber terug op senter vir sy verpligtinge in Johannesburg, terwyl die Gautengers hul span onveranderd gelos het van die een wat teen die Ikeys verloor het.
Pukke het die blitsige Bom Samaai op vleuel gekies vir hul wedstryd op die Fanie en sal hoop dié Luiperds-speler ly nog aan dieselfde doellynkoors wat hy verlede seisoen openbaar het.
Stoffel Duvenhage voer die Pukke aan.
Die TUT se aanslag word versterk met Adillio Coutriers en sy kanonvoet terug op heelagter. Die besoekers is beslis in staat tot ’n oorwinning in Potchefstroom, waar dinge vanjaar maar net nie aan die gang wil kom nie.
- Rapport