SA rugby pronk met jong geslag
2012-04-29 00:13
- Artikelopsies
- Deel
- Kry Rapport op
Suid-Afrikaanse rugby bevind hom in ’n bloeitydperk – wat die Springbok-afrigter, Heyneke Meyer, se langtermynplan die minste van sy probleme sal maak.
Die nuwe generasie van Johan Goosen, Robert Ebersohn, Eben Etzebeth, Siya Kolisi, Frans Malherbe, Steven Kitshoff en Marcell Coetzee kan straks almal in die nabye toekoms Bokke word.
Nietemin sal Meyer met net ’n week tot sy beskikking ’n span moet brei om vir Engeland in die eerste toets op 9 Junie te klop.
En dit gaan nie gebeur deur ’n hele spul belowende jong spelers – hoe indrukwekkend ook al – vir die wolwe te gooi nie.
Daar is ’n handjievol senior manne wie se ervaring, eerder as onmiddellike spelpeil, hulle deel van die Bok-opset behoort te maak. Die juniors kan dan stadig maar seker bykom.
Morné Steyn is byvoorbeeld nog nie op dreef nie, maar Suid-Afrika het nie nou al ’n beter alternatief nie.
Intussen verdien Goosen sy plek in ’n vormspan, maar sy talent kan vir eers maar in die SA o.20-span op die Junior Wêreldkampioenskap geslyp word.
Dieselfde geld Kitshoff, wat maklik genoeg ’n vormspan kan haal, maar met gesoute loskopstutte soos Tendai Mtawarira en Dean Greyling om ’n Bok-trui meeding.
Soos gewoonlik is Suid-Afrika ’n losvoorspeler-fabriek met jong manne soos Kolisi en Coetzee wat uitblink. Keegan Daniel staan uit as agtsteman in die Haaitenk.
Bryan Habana is besig om sy selfvertroue te herwin en bevind hom nou op senter, maar soos in die geval van JP Pietersen is vleuel op toetsvlak sy voorland.
Etzebeth lyk ongeag sy gebrek aan ervaring gereed vir toetsrugby. Andries Bekker verdien die nr.?5-trui, maar Juandré Kruger blaas in sy nek.
Malherbe se skrumwerk is verwoestend wanneer die Stormers hom opstuur, maar dis as impakspeler. Werner Kruger is waarskynlik die keur onder die vaskopstutte wat wedstryde begin.