Stormers en WP-rugbybase glo in geld-twis

Die Stormers-spelers en die Westelike Provinsie Rugbyunie is skynbaar in ’n geldtwis gewikkel.

Volgens Rapport se bronne is die Stormers-spelers ongelukkig omdat die unie hulle kleiner wedstrydgeld en wenbonusse betaal as wat deur die Suid-Afrikaanse Rugbyspelersvereniging (Sarpa) se jongste kollektiewe ooreenkoms met die Suid-Afrikaanse Rugby-werkgewersorganisasie (Sareo) bepaal word.

Volgens dié nuwe ooreenkoms is spelers geregtig op wedstrydgeld van R3 000 per wedstryd, asook wenbonusse van R3 000.

Die WP betaal glo die Stormers-spelers slegs R2 000 per wedstryd en dieselfde vir seges wat die span behaal.

Wedstrydgeld en wenbonusse is betaalbaar aan elkeen in die 22-tal vir ’n betrokke wedstryd. Wanneer spanne oorsee is, word die hele toergroep vergoed.

Na verneem word, het die Stormers-spelers ’n vergadering vir môre met die besturende direkteur van WP Rugby (Edms.) Bpk., Rob Wagner, belê.

Ofskoon die geskil nog nie ’n volskaalse krisis is nie, het die spelers hulle na Sarpa gewend om die geskil namens hulle by te lê.

Sarpa se uitvoerende hoof, Piet Heymans, wou hom nie gister uitlaat oor die twis nie: “Ons wil nie enige kommentaar lewer nie. Ek dra kennis van die kwessie, maar hopelik kan dit intern opgelos word.”

Wagner het dit gistermiddag betwis dat die WP enige geld aan die Stormers-spelers verskuldig is en hulle te min betaal.

“Dis ’n verkeerde aanname. Ons het ’n ander kontrak? met die spelers,” het Wagner aan Rapport gesê.

Die Stormers het dié naweek ’n loslootjie gehad en hervat hul Super-veldtog Saterdag wanneer hulle op Nuweland met die Cheetahs kragte meet.

Hulle is Vrydag deur die Bulls as die voorste Suid-Afrikaanse span in die Super-reeks onttroon en sal die komende naweek ’n volle vyf punte teen die Vrystaters wil inoes om die druk op die Pretorianers te hou in hul strewe om regstreeks vir die halfeindronde van die kompetisie te kwalifiseer.