Stormers hou duim vas oud-Blou blits herwin spelpeil
2012-01-07 23:10
- Artikelopsies
- Deel
- Kry Rapport op
Winskopie – of ’n bul in die Stormers se drinkwater?
Gerhard van den Heever, wie in 2010 nog as ’n ernstige kandidaat vir ’n Springbok-trui beskou is, sal in die volgende maand of twee dáárdie vraag met sy praatwerk op die veld moet beantwoord.
Dié 22-jarige vleuel was om ’n paar redes vir die Westelike Provinsie ’n omstrede aanwins. Eerstens het hy 72 eersterangse wedstryde in ’n ligbou-trui gespeel – en Kapenaars hou nie van daardie kleur nie.
Dan is daar die kwessie van waar die WP se prioriteite lê in terme van kontraktering. Van den Heever en Joe Pietersen is onder die aanwinste, terwyl ’n nuwe kontrak van drie jaar aan Bryan Habana toegeken is.
Twee Springbok-voorspelers – CJ van der Linde en Francois Louw – het saam met Jaque Fourie, Johann Sadie en JJ Engelbrecht die pad gevat. Moes die WP, benewens Deon Carstens, nie maar eerder na nog ’n stut gekyk het nie?
Daardie besluite is egter nie Van den Heever s’n nie en dalk sal die Stormers se ondersteuners positief oor die saak voel as daar na sy statistieke gekyk word. Hy het in sy 72 eersterangse wedstryde in Pretoria 31 drieë gedruk.
As jy vir die WP vra wat die plan met Van den Heever is, sal jy die antwoord kry dat hy óók kan heelagter speel.
Die laaste vesting behoort egter deur Pietersen of Gio Aplon beman te word. Van den Heever het immers net twee van sy 72 eersterangse wedstryde as heelagter begin.
Sy buiging in Superrugby was, ironies genoeg, teen die Stormers in die “Luke Watson-wedstryd” op Loftus in 2009.
Watson, wie met baniere en ’n doodsdreigement begroet is vir ’n paar lelike uitlatings, het tot groot ontsteltenis van die skare Van den Heever se trui oor sy kop getrek, nadat die Blou Bul-vleuel hom langs die kantlyn probeer karnuffel het.
Maar tyd genees sulke wonde – en Van den Heever moet nou maar in ’n Streeptrui gaffel.
Sy groot jaar was 2010 toe hy vir die Bulls 8 drieë in 13 wedstryde gedruk het. Verlede jaar was daar ’n insinking – 3 in 14.
Dis egter op veel meer as sy drieërekord wat Van den Heever in die Kaap beoordeel sal word. Kan hy sy werkverrigting op dieselfde vlak as Bryan Habana kry en weer die spelpeil van 2 seisoene gelede herwin?
Vir die WP is daar is ook die voordeel dat hy gereeld in die Curriebeker sal speel en daar dus in meer as een toernooi waarde ontgin sal word.
Hopelik vir die Stormers is “Shadow” nie meer ’n skadu van die speler wat hy in 2010 was nie.