Stormers op die SA kruin
2012-07-07 22:46
Wéér kampioene van die Suid-Afrikaanse Super-groep – én soos sake staan, ’n enkele ligapunt daarvan weg om seker te wees van ’n tuis-halfeindstryd op Nuweland.
Gister se Stormers-sege van 13-6 oor die Cheetahs hier in gure weersomstandighede was wéér nie skouspelagtig nie, maar ná 13 sulkes is die Kaap weer Hollands.
Dis in elk geval nie vandag húlle wat vrae oor lelike rugby moet beantwoord nie. Daardie aantyging moet voor die deur van die Cheetahs gelê word, wat soveel geskop het dat Bloemfontein Celtic straks in Riaan Smit se dienste gaan belangstel.
Die Cheetahs se afrigter, Naka Drotské, het straks vooraf die sommetjie gemaak dat dit nie deug om die bal deurentyd teen die Stormers te dra nie – en sy span se skoptaktiek gister was dieselfde taktiek wat die Stormers vroeër dié seisoen op Nuweland uit hul gemaksone gehaal het.
Vir ’n rukkie het die Cheetahs die stryd om veldgebied gewen en kon die Stormers nie hul ritme vind nie. Die besoekers het ook in die eerste helfte hul eerste twee lynstane verloor.
Maar die Stormers het mettertyd beheer oorgeneem en Peter Grant se stewel het eerste gepraat, voordat Smit geantwoord het.
Die rustydtelling van 3-elk het die Cheetahs goed gepas. Wie weet wat kon gebeur as ’n hoë skop in die tweede helfte verkeerd spring?
Die Stormers het egter vanaf die afskop in die tweede helfte die wedstryd aan die kraag gegryp en in die Cheetahs se gebied kamp opgeslaan. Daar was vir die tuisspan mettertyd geen ander opsie as om te oortree nie – en toe Marius Jonker se waarskuwing op dowe ore val, het Willie le Roux die trekpas gekry nadat hy uit desperaatheid ’n aangee vorentoe geklap het.
Grant is aangesê om pale toe te korrel, maar ná sy suksesvolle poging het die Cheetahs weer ’n weg teruggevind en die telling weer gelykop gemaak danksy Smit se skopstewel.
Die Stormers het besit vanaf die daaropvolgende inskop bewerkstellig en ’n dwarsskoppie van Grant het reggespring vir Gio Aplon, wat deurgedraf het vir wat uiteindelik die beslissende drie was.
In die oorblywende tyd was die Stormers se verdediging soos altyd ondeurdringbaar en hulle kon telkens enige gevaarlike Cheetah-beweging gou-gou smoor en die tuisspan van hul doellyn weghou.
Die vraag is nou of die Stormers goed genoeg toegerus is om vanjaar se Super-toernooi te wen. Wel, as jy kan duik en verdedig soos die Kapenaars én jy het ’n losskakel wat sekuur kan korrel, moet jy ’n redelike goeie kans hê op sukses in enige wedstryd.
Grant het in vanjaar se Super-reeks tot dusver met 39 uit 42 skoppe na die pale geslaag. Dis ’n slaagsyfer van 93%.
Maar Grant doen veel meer as om net skoppe deur die pale te jaag. Hy was gister puik in alle opsigte en het ’n hele paar bresse in die Cheetahs se verdediging geslaan.
Vir hul goeie spel tot dusver dié seisoen is die Stormers gister met ’n trofee as die voorste SA Super-span beloon.
Maar om Suid-Afrika se kampioen te wees, is nie waarna hul streef nie. Konings van die Suidelike Halfrond wil hulle wees.