Streep-suiker vir flou Bulle
2012-09-01 23:52
Moeilike tye vra taai manne – en die rugbyspan van die WP het gisteraand hier hul Curriebeker-seisoen klinkend op koers gekry, deur die Blou Bulle met 42-6 af te slag.
Die uitslag was waarskynlik vir amper almal ’n verrassing, met die Pretorianers tot dusver dié seisoen warm en die Streeptruie gereeld aan geluk se verkeerde kant.
Dié keer het hulle die lente ingewy met hul eerste bonuspunt aan drieë van die jaar – en dit kon sweerlik nie meer bevredigend gewees het teen enigiemand anders as die ou Blou aartsvyand nie.
Die besoekers se sondes het voorlangs begin, met die gelapte agttal van die WP wat veel meer uitgerig het as wat enigeen vooraf sou probeer raai.
Só sleg het die Bulle gister hier afgetjop dat dit moeilik is om te glo dat hulle nié oorgerus was nie, maar terselfdertyd kan jy ook nie krediet weerhou van ’n bloedjong WP-span nie.
Hier is ’n paar spelers wat nog diep spore kan trap, soos die senters Marcel Brache en JP du Plessis en die slot/flank Don Armand, maar gisteraand was die onbesonge klein hakertjie Scarra Ntubeni veral die vergestalting van WP-veggees.
Dié oorwinning was, in ander konteks, ewe belangrik vir die Streeptruie as dié wat hul senior kollegas laat in die Super-seisoen op Loftus gaan behaal het.
Daai ene was dalk moeiliker, maar gisteraand het ’n amper totaal nuwe geslag spelers ’n inspuiting selfvertroue gekry wat hulle dalk die res van hul loopbane kan bybly.
Vir die Bulle moes dié ervaring seergemaak het. Dis nie maklik om op Nuweland te kom wen nie, maar om só ’n pak slae op die lyf te loop teen ’n span wat soveel meer probleme deur die week moes oplos, sal nie maklik in enigeen se klere gaan sit nie.
Die Bulle se voorspelers kon g’n platform verskaf nie en is deurgaans in die vaste los oordonder. En hul agterlyn kon nie veel uitrig met krummels nie.
Die WP het ál beter gespeel soos die wedstryd gevorder het – en jy kon voor jou oë sien hoe spelers soos Du Plessis en Ntubeni by mekaar aansteek. Eindelik was die WP waaghalsiger as wat ons hom in ’n paar seisoene gesien het, maar as dinge die dag vir jou werk, wérk hulle.
Dalk was die relatiewe groenheid van die WP die Bulle se doodsteek – die jongelinge speel met minder angs as hul meer senior kollegas – maar hoe dit ookal sy, dié wedstryd het die Curriebeker-kompetisie weer wawyd oopgeruk.
Van tweede laaste op die punteleer het die Streeptruie na tweede opgeskiet.
Curriebeker-rugby is deesdae té uitgedun en afgewater om té veel bestendigheid te verwag van die spanne, maar gisteraand het die WP homself ook aangekondig as ’n span wat vanjaar enige tyd en enige plek kan wen.